Радий Хәбировтың сәсе ниңә салланған?

Алдан хәбәр итеүебеҙ буйынса, бөгөн Башҡортостан Башлығы Радий Хәбиров "Ведомости" баҫмаһына ҙур интервью бирҙе. Һөйләшеүҙең ҙур ғына өлөшө махсус хәрби операцияға ҡағылды. – Дөйөм алғанда, иҡтисад хәрби рельстарға үҙгәртеп ҡороламы? – Башҡортостанда Ростехтың периметрындағы ҙур предприятиелар: Күмертау авиация предприятиеһы, Өфө моторҙар эшләү производство берекмәһе, башҡа бер нисә заводтар. Әле улар заказдар менән тәьмин ителгән. Уларҙың проблемаһы – эшсе ҡулдарҙың етмәүе. Дөйөм алғанда, әле республикала эш ҡулдары етмәй, шулай уҡ бөтә Рәсәй буйынса ошондай хәл күҙәтелә. Беҙҙә тәүге тапҡыр Халыҡ-ара хеҙмәт ойошмаһы методологияһы буйынса эшһеҙлек кимәле – 3,4 процент. Кешеләр етешмәй. Иҡтисадты туранан-тура үҙгәртәбеҙ, тип әйтә алмайым. Беҙҙәге бурыс – иҡтисадты үҫтереү. Һәм МХО өсөн нимәлер эшләргә кәрәк икән, эшләйбеҙ. Петербург халыҡ-ара иҡтисади форумында беҙ БАС-200 беспилотнигы менән таныштырҙыҡ. Ләкин ул – граждандар авиацияһы өсөн. БПЛА-ны әле Өфө фән һәм технологиялар институты нигеҙендә, Нефть университеты базаһында әҙерләйҙәр. Ниндәйҙер бәләкәй предприятиелар нигеҙендә коптер йыйыусы һәм уларҙы алғы һыҙыҡҡа ебәреүсе кешеләр төркөмө төҙөлә. – Ә республикала БПЛА етештереү кластерын асырға теләгәйнеләр түгелме? – Эйе, беҙ уны сафҡа индерергә ниәтләйбеҙ, әммә әлегә ул формалашыу стадияһында. Башҡортостан Рәсәйҙә махсус операцияға тиклем үк пилотһыҙ осоу өсөн эксперименталь хоҡуҡи режим алды. Әлеге ваҡытта радиоэлектроника кластерын эшләтәбеҙ, уға заявка бирәбеҙ, шунан һуң финанслау алырға һәм объектты төҙөй башларға тейешбеҙ. Башҡортостанда әле төрлө класлы БПЛА етештереү буйынса Ҡытай һәм Белоруссия предприятиеларын йәлеп итеүгә өлгәштек. Улар бер нисә изделие тәҡдим итте һәм хәҙер сериялы етештереүгә сығырға ниәтләй. – Махсус хәрби операцияға күп республика чиновниктары юлландымы? – Ә нимә ул күп – ун, 100, 200? Беҙҙә ундан ашыу чиновник китте. Мәҫәлән, Хөкүмәт рәйесенең беренсе урынбаҫары Азат Бадранов. Йәш егет, уға 36 йәш. Ирекмәндәр батальоны составында бер йыл тиерлек һуғыша. – Ә республика МХО-ға күпме батальондарҙы оҙатты? – Беҙҙең өс ирекле батальон унда инде. Июнь аҙағында унда юлланасаҡ полкты формалаштырыуҙы тамамланыҡ. Уның составында – өс мотоуҡсылар батальоны, танк батальоны, ике артиллерия дивизионы, автобат, идара итеү, штурм отряды. – Республика һәләк булған хәрбиҙәр һәм мобилизацияланғандарҙың ғаиләләренә нисек ярҙам итә? Ниндәйҙер төбәк түләүҙәре бармы? – Ярҙам бөтә йүнәлештәр буйынса – төбәк кимәлендә лә, муниципалитеттарҙа ла бара. Республика бюджетынан ярҙамға 4 миллиард һумдан ашыу аҡса бүленгән. Федераль түләүҙәрҙән тыш, мәҫәлән, башҡорт батальондарында хеҙмәт иткәндәргә – 200 мең һум күләмендә бер тапҡыр бирелә торған пособие һәм һәр көн хеҙмәт өсөн 2 000 һум күләмендә айлыҡ түләү, шулай уҡ башҡа түләүҙәр һәм льготалар бар. – Махсус операция башланғандан һуң тормошоғоҙ нисек үҙгәрҙе? – Сәсем ныҡ салланды. Ваҡыты еңел түгел бит. – Махсус операция тамамланыр тип көтәһегеҙме? – Көтмәйбеҙ. Еңеүгә өлгәшеү өҫтөндә эшләйбеҙ. Фото: социаль селтәрҙән.