Астана - Өфө дуҫлығы

Улар “Башҡортостан Республикаһы Ҡаҙағстан балалары күҙлегенән” һәм “Ҡаҙағстан Республикаһы Башҡортостан балалары күҙлегенән” тип аталды. Ҡатнашыусыларҙы “Астана - Өфө: дуҫлыҡ траекторияһы” телекүперендә ҡотлап үттеләр. Был мәртәбәле сара Башҡортостан Республикаһы көнөнә һәм Ҡаҙағстан Республикаһының баш ҡала көнөнә арналған. Йәш рәссамдарҙың был ижади бәйгеһен ЮНЕСКО эштәре буйынса республика комитеты, Ә. Вәлиди исемендәге Республика милли китапханаһы, Астана ҡалаһының ЮНЕСКО балалар һынлы сәнғәт мәктәп-клубы һәм Ҡаҙағстандың беренсе президенты китапханаһы ойошторған. Конкурс, ике республиканың дуҫлығын һәм мәҙәни-гуманитар бәйләнешен үҫтереү маҡсатында уҙғарылған. Проектта 7 йәштән 12 йәшкә тиклем 260-тан күберәк бала ҡатнашҡан, шулай уҡ коррекцион мәктәптәрҙең дә тәрбиәләнеүселәре ситтә ҡалмаған. Йәш рәссамдар, Башҡортостан һәм Ҡаҙағстан халыҡтарының үҙенсәлеге, этномәҙәни ҡиммәттәре, милли йолалары, иҫтәлекле урындары, әкиәт-риүәйәттәре менән яҡындан танышҡан. Йәш таланттарҙың эштәрендә шулай уҡ мәҙәниәт һәм тәбиғәт мираҫтары ла урын алған. – Был сара беҙҙең берҙәмлекте, көстө тойорға, беҙҙең халыҡтарҙың дуҫлыҡ шатлығын бүлешергә мөмкинлек бирҙе. Беҙ балаларҙың һүрәттәре аша республикаларыбыҙҙың иң мөһим байлығы – мәҙәниәте, кешеләре, уларҙың тормошо һәм йолалары тураһында бер-беребеҙгә һөйләй алдыҡ. Балаларҙың ижади һәләттәрен асыуға ярҙам иткән барлыҡ ойоштороусыларға ла рәхмәт һүҙҙәре еткерәм, – тип белдерҙе ЮНЕСКО эштәре буйынса Башҡортостан Республикаһы комитетының башҡарма директоры Элина Ғатауллина. Конкурстың еңеүселәренә һәм призерҙарына сертификаттар һәм ҡиммәтле бүләктәр тапшырылды. Гран-приҙы милли батырыбыҙ Салауат Юлаевтың һәйкәлен һүрәткә төшөрөп, Байғамин ижад үҙәге тәрбиәләнеүсеһе алһа, Башҡортостандан Гран-приҙы рәсемендә Ҡаҙағстандың традицион мәҙәни элементтарын оҫта ҡулланып, ЮНЕСКО-ның ассоциацияланған мәктәбе – Ҡ. Дәүләткилдеев исемендәге республика һынлы сәнғәт мәктәп-интернатының тәрбиәләнеүсеһе яуланы. Ойоштороусылар шулай уҡ Рәсәйҙең һәм Ҡаҙағстандың Сауҙа вәкәләтлеге вәкиле Урал Аҙнабаевҡа һәм “Тере Ер” Яр-Бишҡаҙаҡ витамин заводына рәхмәтле. Иҫегеҙгә төшөрәбеҙ, быйылғы йылда Башҡортостан һәм Ҡаҙағстан республикалары араһындағы сауҙа-иҡтисад хеҙмәттәшлеге буйынса килешеүгә ҡул ҡуйыуға 30 йыл тула. Бөгөнгө көндә ике республиканың иҡтисади, сәйәси һәм мәҙәни бәйләнештәре тәңгәлендә борсолорға урын юҡ. Фотолар: ЮНЕСКО эштәре буйынса республика комитетының матбуғат хеҙмәте.