Үрге Тәтешле үҙәк район дауаханаһы, “Һаулыҡ һаҡлау” милли проектына ярашлы, заманса видеоколоноскоп ҡорамалы алды. “Пентакс” фирмаһында етештерелгән ҡорамал төрлө йәштәге пациенттар өсөн тәғәйенләнгән. Диагностик мөмкинлектәре HD+ сифатына ярашлы. Инновациялы технология һүрәтте анализлай һәм бер нисә үҙенсәлекле фильтрҙарҙы ҡуллана. Һөҙөмтәлә табип юғары контраслы һәм аныҡ һүрәттәр менән эш итә. Лайлалы тиресә структураһы айырмалығын тикшереүҙә лә ҡорамал тәьҫирле, ҡан тамырҙары асығыраҡ күренә, шулай уҡ шик тыуҙырған сиктәрҙе яҡшы асыҡларға мөмкин. – Яңы ҡорамал диагностика теүәллеген арттыра, пациенттарҙы күберәк ҡабул итергә мөмкинлек бирә, тикшереүҙәрҙе көтөү ваҡытын ҡыҫҡарта, – тип билдәләне дауахананың баш табибы Илгиз Шәңгәрәев. Рәсәй Президенты Владимир Путиндың “май “ указдарына ярашлы, 2024 йылға ил үҫешенең төп маҡсаттарына өлгәшергә кәрәк. Шуларҙың араһында халыҡ һанын арттырыу, граждандарҙың тормош сифатын яҡшыртыу, иҡтисадҡа һәм социаль өлкәгә һанлы технологияларҙы индереү мөһим бурыстарҙың береһе булып тора.”Һаулыҡ һаҡлау” милли проектының (национальный проект “Здравоохранение) төп маҡсаты – хеҙмәткә һәләтле йәштәге халыҡтың үлем күрһәткестәрен, ҡан әйләнеше сирҙәренән, ямаш шештәрҙән үлем осраҡтарын кәметеү, инновацион медицина технологияларын индереү, шул иҫәптән пациенттар сәләмәтлеген иртә диагностикалау һәм дистанциянан тороп мониторинг үткәреү алымдарын ҡулланыу. Һаулыҡ һаҡлауҙың тәүге звеноһын яңыртыу программаһы маҡсаты – сифатлы һәм һәр кем файҙаланырлыҡ медицина ярҙамы күрһәтеү, шул иҫәптән төпкөлдә, бәләкәй тораҡтарҙа йәшәгән халыҡ өсөн. Фото: Һаулыҡ һаҡлау министрлығы.