Тағы хәүефле осор башлана

Уҙған аҙнала Башҡортостан халыҡ-ара кимәлдәге сара – Рәсәй һәм Беларусь төбәктәренең Х юбилей форумын ҡабул итте. Бөгөн Хөкүмәттең аҙналыҡ кәңәшмәһендә уға йомғаҡ яһалды. Башҡортостан Башлығы Радий Хәбиров белдереүенсә, беҙгә килгән бөтә ҡунаҡтар ҙа форумды ойоштороу кимәленән ҡәнәғәт ҡалған. – Валентина Матвиенко менән Наталья Кочанова форумды ойоштороу кимәле, республиканың нисек йәшәүен күреп һоҡланыуын йәшерә алманы. Минеңсә, был, ысынлап та, республикалағы иң ҙур һәм мөһим сараларҙың береһе булды. Беҙҙең өсөн Беларусь мөһим стратегик партнер. Барлыҡ командабыҙ менән республиканы күрһәтә һәм алға этәрә алдыҡ. Ҡунаҡтар беҙҙәге тәртипкә лә иҫтәре китте, – тине Радий Фәрит улы. Шулай уҡ Радий Хәбиров үҙенең идара итеү командаһына рәхмәт һүҙҙәрен әйтте. Тәү сиратта Хөкүмәт Премьер-министры Андрей Назаровҡа мөрәжәғәт итте. – Андрей Геннадиевич, һеҙгә айырым рәхмәт, Хөкүмәт бик ҡатмарлы, ҙур эш башҡарҙы. Шулай уҡ Рөстәм Моратовҡа һәм Маргарита Болычеваға рәхмәт иғлан итәм. Мәҙәниәт, спорт йүнәлеше буйынса ла ҙур эш башҡарылды. Барығыҙ ҙа тырыштығыҙ, һәйбәт сара килеп сыҡты. Беҙ төбәктәр башлыҡтары өсөн уңайлы шарттар булдырҙыҡ, улар үҙ-ара тыныс аралаша алды, – тине ул. Форум көндәрендә Өфө хосписы ла асылды. Башҡортостан Башлығы әйтеүенсә, ул тәүге пациенттарҙы 5 июлдә ҡабул итәсәк. Радий Хәбиров был паллиатив ярҙам күрһәтеүсе медицина учреждениеһын булдырыуға өлөшө булған һәр кемгә рәхмәт әйтте. – Уны асыуға оҙаҡ ваҡыт барҙыҡ. Һөҙөмтәлә файҙалы, матур, бик кәрәкле хоспис барлыҡҡа килде. Уны булдырыуҙа ҡатнашҡан, финанс ярҙамы күрһәткән кешеләргә рәхмәт әйткем килә. Әлбиттә, был объект “ауыр”. Унда ятҡан кешеләр бик ауыр сирләй, шуға күрә хоспис үҙе һәр саҡ яҡты булырға тейеш. Нюта Федермессер әйтеүенсә, хоспис – үлем түгел, ә тормош тураһында. Бында ятҡан кешенең һәр көнө иғтибарҙа, яҡшы шарттарҙа үтергә тейеш, – тине Радий Хәбиров. Билдәле булыуынса, был комплексты бизнесмендар һәм ябай кешеләрҙең хәйриә аҡсаһына, дауалап булмаған сирҙәр менән яфалаған ололарға һәм балаларға паллиатив ярҙам күрһәтеү өсөн төҙөнөләр. Ул ошондай махсуслашыу өсөн булдырылған Рәсәйҙәге берҙән-бер учреждение. 11-13 августа Баймаҡ районында икенсе Халыҡ-ара “Башҡорт аты” фестивале үтәсәк. Радий Хәбиров әйтеүенсә, унда Татарстан, Тыва, Чечня, Дағстан, Ҡаҙағстан, Төркиә, Әзербайджан, Берләшкән Ғәрәп Әмирлектәренән белгестәр ҡатнашырға теләк белдергән. Көньяҡ Урал райондары хакимиәттәре башлыҡтарына был ҙур сараға әүҙем әҙерлек башларға ҡушылды. “Хакимиәт башлыҡтары, фестивалдә әүҙем ҡатнашыуығыҙҙы һорайым. Һеҙ һыбайлыларҙың костюмлы төркөмдәрен әҙерләргә тейеш. Был Баймаҡ, Көньяҡ Урал ғына түгел, ә бар республика кимәлендәге ҙур сара,” – тине ул. Был аҙнала йәнә эҫе һауа торошо көтөлә. Ошо айҡанлы кәңәшмә ваҡытында Башҡортостан Башлығы янғынға ҡаршы хәүефһеҙлек сараларын көсәйтергә ҡушты. Республиканың ғәҙәттән тыш хәлдәр буйынса дәүләт комитеты рәйесе Фәрит Ғүмәров әйтеүенсә, уҙған аҙнала республикала 117 техноген янғын теркәлгән, уларҙа бер кеше һәләк булған. – Белорет районында 10 гектар майҙанда ике урман янғыны теркәлде. Уларҙың береһе һүндерелде, икенсеһе – локалләштерелде. Ауылдарға хәүеф янамай. Бынан тыш туғыҙ гектар майҙанд 13 ҡоро үлән яныуы теркәлде, уларҙың барыһы ла һүндерелде, – тине ул. – Һауа температураһы 30 градусҡа тиклем күтәреләсәк, шуға күрә янғынға ҡаршы сараларҙы көсәйтер кәрәк. Моғайын, улар булыр, иң мөһиме, ваҡытында һүндерер кәрәк, – тине республика етәксеһе. Башҡортостандың торлаҡ-коммуналь хужалыҡ министры вазифаһын ваҡытлыса башҡарыусы Ирина Голованова хәбәр итеүенсә, быйыл егерме муниципалитетта урынлашҡан 274 күп фатирлы йортта 753 подъезды ремонтлау күҙаллана. Программаны тормошҡа ашырыу өсөн 744,4 миллион һум аҡса, шул иҫәптән 670 миллион һумы республика бюджетынан, йүнәлтелгән. Бөтә подъездарҙы ла тикшереп сыҡҡандар, ремонт өсөн төҙөүселәр билдәләнгән. 395 подъезда эштәр бара, 71-ендә тулыһынса тамамланған. Подъездарҙа инеү төркөмө тәртипкә килтерелә, беренсе ҡатта плитә түшәлә, тәҙрәләр алмаштырыла, яңы тамбур ишектәре, почта йәшниктәре ҡуйыла. Эштәрҙе комиссия менән бергә халыҡ үҙе ҡабул итеп аласаҡ. Һуңғы ремонт эштәре 21 ноябрҙә тамамланырға тейеш. Башҡортостан Башлығы министрлыҡҡа подъездарҙы ремонтлау планлаштырылған күп фатирлы йорттарҙың торошона иғтибарлыраҡ булырға ҡушты. Аҡсалар дөрөҫ файҙаланылһын өсөн өҫтөнлөктәрҙе дөрөҫ ҡуйырға һәм ремонтты башҡарыу алдынан башҡа мөһимерәк эштәрҙе башҡарарыға кәрәк. Мәҫәлән, йылытыу, ҡыйыҡ ремонтлау һәм башҡалар. Фото: "Бәйләнештә".