#Шеъриятда_янги_турдош_жанр
(Э Ш С О Н Е Т Л АР )
LXIX
Ўзлигин англолмас само сирлари:
Мендан ишқ асрорин сўрашар пинҳон..,
Тайин айтади деб бўлишар гирён –
Анчайин анойи баъзи бирлари.
Бежизми, ёр, азал асотирлари,
Ўз тилинг ашаддий ағёрдан ёмон –
Минг душман ишини қилар бир забон,
Гарчи ўттиздан кўп довон-қирлари.
Қалб сирин фош қилар кўз ҳаракати,
Айнан маъшуқада нигоҳ маънодор –
Сендан ўзга ҳеч ким сиримни билмас!
Ҳатто сукутингда ишқий маъно бор,
Гулгун ишванг эса – жоннинг роҳати,
Сен бўлмасанг, кўнглим бундай очилмас!!
LXX
– “Ишқ қайда? – саволга тутди ногаҳон
Боғимда гулсевар асаларилар. –
Айтинг, ул чаманга қандай борилар –
Биз кезиб топмадик жумлаи жаҳон?!”.
Бир зумлик ҳажрингдан азобланар жон,
Дунё – узлат сендан узоқлашсам гар.
Ул асаларилар кўрган ситамлар –
Мен сени топишга излаган имкон!
Имконсиз дамларим ҳақида айтсам,
Етказиб қўярман қалбинга озор,
Сен фақат бахтиёр онларимни бил!
Бир гап бор: отанг ҳам, онанг ҳам – бозор...
Йўқ, ишқда даллол йўқ, ягона ҳакам –
Севгига йўлиққан озурда кўнгил!
LXXI
Нигоҳин узмас ҳеч тун бўйи қамар,
Гулларни сен учун экмаганмидим..,
Рашким янглиғ ҳар бир атиргул ғижим,
Райҳонлар ифори – ёзилган асар!
Талант йўқдир Танҳо Муаллиф қадар,
Чин, Унинг Сўзидан – менинг ҳар сатрим!!
Йўқса, қандай қилиб ашъор ёзардим,
Ғафлатда қолгай кас – ўқимаса гар.
Малагим, гинам йўқ шеърсеварлардан,
Аслан, васлингни васф айламак – шараф,
Ўйлайманки, қалбни эъзозлагайсан!
Сал нарида эса, ҳажринг – бир тараф,
Зар қадрин сўрама мендай заргардан –
Барибир муносиб баҳоламайсан.
"Қалб салтанати" — танланган асарлар, 2-жилд китобидан.
© Сафар ОЛЛОЁР
Telegram kanalimizga obuna bo'ling:
👉 https://t.me/safarolloyor