Ҡариҙел ауылындағы “Прибрежный” паркында Бөтә донъя балалар футболы көнөнә арналған сара үтте. Ул “Демография” милли проектының “Спорт – йәшәү нормаһы” төбәк программаһына ярашлы ойошторолдо. Байрамда йөҙҙән ашыу кеше ҡатнашты – хакимиәттең спорт комитеты, мәғариф бүлеге вәкилдәре, балалар һәм үҫмерҙәр спорт мәктәбе, 1-се мәктәп, “Айдос” балалар лагеры һәм район мәҙәниәт һарайы тәрбиәләнеүселәре. Сәләмләү телмәре менән спорт комитеты рәйесе Вячеслав Симиряков мөрәжәғәт итте. Ул балаларға сәмсел, ныҡлы булырға һәм ҙур еңеүҙәргә өлгәшеүҙе телне. Балалар-үҫмерҙәр үҙәге балалар өсөн төрлө конкурстар һәм фотозона ойошторған. Район мәҙәниәт һарайы хеҙмәткәрҙәре күңелле йырҙары менән кәйефте күтәрҙе һәм футбол тематикаһына ҡыҙыҡлы викторина әҙерләгән ине. Сара һәр кемгә бик оҡшаны. Конкурстар тамамланғас, 1-се мәктәп менән “Айдос” лагеры тәрбиәләнеүселәре араһында турнир үткәрҙеләр. Уйын дуҫлыҡтың еңеүе менән тамаланды. “Беҙ футболды яратабыҙ, шуға дуҫтар менән килдек. Даими рәүештә күнекмәләргә йөрөйбөҙ, өйҙә лә гел уйнайбыҙ. Футбол донъялағы иң яҡшы уйын. Беҙ иң яҡшы уйынсылар булырға хыялланабыҙ. Бик күңелле булды”, – тине оҫталыҡ дәресендә ҡатнашҡан 5 класс уҡыусыһы Ринат Мөғәллимов. Билдәле булыуынса, "Демография" (национальный проект “Демография”) милли проекты Рәсәй Президенты Владимир Путиндың май указы менән булдырылды. #ВладимирПутин #национальныепроекты#нацпроекты #региональныепроекты#регпроекты#нацпроектыБашкортостан Фото: Ҡариҙел районы хакимиәте.