Հուլիսի 15-ին Հովհաննես Շարամբեյանի անվան ժողովրդական արվեստների թանգարանում կբացվի «Է» ցուցահանդեսը, որտեղ կներկայացվեն Սուրեն Մանվելյանի յուրօրինակ լուսանկարները և Արմեն Ղազարյանի գեղանկարչական աշխատանքները:
Ցուցահանդեսն իրականացվում է «Մատուռ» երգչախումբ. հայկական միջնադարյան հոգևոր երաժշտություն» նախագծի շրջանակում, որի նպատակն է արական ինքնատիպ երգչախումբ-լաբորատորիայի ստեղծումը՝ ուսումնասիրելու և հնարավորինս վերականգնելու միջնադարյան հոգևոր երաժշտության կատարման մեթոդը: Ցուցահանդեսն իրականացվում է «301 Իմաստունների երկիր» հիմնադրամը՝ Ժողովրդական արվեստների թանգարանի և ԱրմՆոուվո կազմակերպությունների հետ համագործակցությամբ:
Ցուցադրության ողջ ընթացքում այն կզուգորդվի «Մատուռ» երգչախմբի կողմից միջնադարյան հոգևոր երաժշտության կատարումներով, միջնադարյան հոգևոր պոեզիայի և երաժշտության սեմիոտիկան ստուգաբանող դասախոսությունների շարքով (երաժշտություն՝ «Մատուռ երգշախումբ». Միքայել Ոսկանյան, դասախոսություններ՝ Արթուր Շահնազարյան, Արծրունի Սահակյան, Հասմիկ Բաղրամյան, Զավեն Սիմոնյան, Աշոտ Աբգարյան, Լուսինե Սահակյան, Հենրիկ Բախչինյան, Մարգարիտ Սարգսյան, Հայր Ասողիկ):
Ցուցահանդեսի խորագրի ընտրությունը պատահական չէ. այն հնարավորություն է գտնվելու ինքնադրսևորման արտահայտչամիջոցների խաչմերուկում, քանի որ Է-ն հայկական այբուբենի յոթերորդ տառն է, որը նշանակում է մտածելու կարողություն, նկարագրում է գործողություն կամ առարկայի վիճակ, էություն, իրադարձությունների և գործողությունների ներքին բովանդակություն:
«Է» ցուցահանդեսի բացումը տեղի կունենա հուլիսի 15-ին, ժամը՝ 17:00-ին, Ժողովրդական արվեստների թանգարանում ( հասցե՝ Աբովյան 64): Ցուցահանդեսը կգործի մինչև օգոստոսի 2-ը: