Өҫкө урман янғыны туҡтатылған, әммә тынысланырға иртә

Белорет районының Үҙән урмансылығында өҫкө урман янғынын туҡтатыуға өлгәшкәндәр. Был хаҡта ваҡиға урынында булған республиканың урман хужалығы министры Марат Шәрәфетдинов хәбәр итте. Алдан хәбәр итеүебеҙсә, көслө ел арҡаһында тәүлек эсендә ут ағастарҙың башына күсә һәм көслөрәк тарала, янғын 320 гектар майҙанды биләп алды. Яҡындағы Аҙнағол һәм Ҡатарыш ауылдарына ут таралыу ҡурҡынысы килеп тыуа. Шуға күрә районда Ғәҙәттән тыш хәл режимын индерергә ҡарар ителә. – Әле беҙ вертолеттан төшөп торабыҙ, осош яһаныҡ. Төтәп ятҡан һәм асыҡ ут сығанаҡтары бар, янғын ерҙән бара. Шуға ҡарамаҫтан, тынысланырға иртә, сөнки бөгөн йәнә ел көслө иҫә, - тип билдәләне урман хужалығы министры. Марат Шәрәфетдинов һүҙҙәренсә, урман янғынында кемдеңдер ҡыҫылышы юҡ, сөнки сығанаҡ туристар булмаған тайгала урынлашҡан. Янғын башланған көндә йәшенле ямғыр яуған, унан һуң Белорет районында бер үк ваҡытта өс усаҡ асыҡланған: икәүһе – Үҙән урмансылығы кварталында һәм береһе – Башҡорт дәүләт ҡурсаулығында. Хәҙер янғынды Ғәҙәттән тыш хәлдәр министрлығының һәм Башҡортостандың Ғәҙәттән тыш хәлдәр буйынса дәүләт комитетының аэромобиль төркөмдәре, урындағы янғын һүндереүселәр, Урман хужалығы министрлығы хеҙмәткәрҙәре һәм ирекмәндәр һүндерә. Белорет районы хакимиәте башлығы урынбаҫары вазифаһын башҡарыусы Сергей Ляпин һүҙҙәренсә, урында 200-гә яҡын кеше һәм 50 берәмек техника эшләй. Әлеге ваҡытта Аҙнағол һәм Ҡатарышҡа ут таралыу ҡурҡынысы юҡ. Шуға ҡарамаҫтан, ауылдар янында өҫтәмә янғыға ҡаршы һыҙаттарҙы һөрәләр. – Хәҙер бөтә көстәр янғынды ауыҙлыҡлау, ут таралыуын туҡтатыу өсөн биләмәнең ситенә йүнәлтелгән. Янғын сығанағы барыу ауыр урында булыуы хәлде ҡатмарлаштыра, техника бөтә ерҙә лә үтә алмай. Шуға күрә әле урмансылар менән берлектә эш алып барыла. Улар уттың юлын быуыу юлдарын эҙләй, – тип һөйләне Сергей Ляпин. Шул уҡ ваҡытта социаль селтәрҙәрҙә Белорет район хакимиәте башлығы Андрей Иванюта Роспотребнадзорҙың өс нөктәлә: Үҙән, Сермән һәм Аҙнағол ауылдарында бысратыусы матдәләр тупланыуын билдәләү өсөн атмосфера һауаһын үлсәү үткәргәнен хәбәр итте. Азот диоксиды, углерод оксиды, аммиак, көкөрт диоксиды, азот оксиды миҡдары рөхсәт ителгән кимәлдән артмай. Белорет районындағы янғын буйынса был мәғлүмәтте “Белорецкий рабочий” гәзите хәбәрсеһе Игорь Калугин “Башинформ” өсөн махсус рәүештә әҙерләнгән. Фото: Фото:Андрей Иванюта/vk.com, mchsrb