Берҙәмлек менән утты еңергә яҙһын

Ғәҙәттән тыш хәлдәр буйынса министрлыҡтың БР буйынса идаралығынан хәбәр итеүҙәренсә, бөгөн авиаразведка үткәргәндән һуң вертолет һәм пилотһыҙ аппараттар ярҙамында янғынды һүндереү буйынса ике төркөм ойошторорға ҡарар ителгән. Тәүге төркөмдә – Рәсәй Ғәҙәттән тыш хәлдәр министрлығы һәм Ғәҙәттән тыш хәлдәр буйынса дәүләт комитеты ҡарамағындағы 45 хеҙмәткәр, һигеҙ урмансы, биш ирекмән, дүрт ағас бысыусы, алты ағас ҡырҡыусы, шулай уҡ ике бульдозер, автоцистерна бар. Янғындың төньяҡ-көнбайыштағы өлөшөндә бульдозерҙар һәм башҡа ҡорамалдар ярҙамында ер һыҙаты һөрөлгән. Башҡарылған эштәрҙән һуң әлеге участкала хәл тотороҡланған, Аҙнағол ауылы халҡына янаған хәүеф кәмегән. Рәсәй Ғәҙәттән тыш хәлдәр министрлығы ҡарамағындағы 30 хеҙмәткәр был йүнәлештән икенсе төркөмдө көсәйтеүгә йүнәлтелгән. Икенсе төркөмдә – 15 урмансы, дүрт ағас бысыусы, алты ағас йығыусы, Рәсәй Ғәҙәттән тыш хәлдәр министрлығы һәм Башҡортостан Республикаһының Ғәҙәттән тыш хәлдәр буйынса дәүләт комитетынан 44 хеҙмәткәр, өс автоцистерна һәм беренсе ярҙам автомобиле. Ике бульдозер ярҙамында көнсығыш, көньяҡ-көнсығыш һәм көньяҡ участкаларҙа урман ситтәрен һөрөү, артыш кеүек ҡыуаҡтарҙы ҡырҡыу ойошторолған. Был йүнәлештә хәл тотороҡланған, уттың һөрөнтө һыҙаттан ситкә сығыуы күҙәтелмәгән. Шулай итеп, көн дауамында янғын периметры буйынса һөрөү эштәре үткәрелгән. Был һаҡлыҡ алымы төньяҡ өлөштә генә башҡарылмаған, сөнки унда ҡая-ташлы урын, эштәр ҡул менән алып барыла. Һөрөнтө һыҙаттың дөйөм оҙонлоғо – 61 километр. Шулай уҡ өс ауыл янында – Үҙән, Аҙнағол һәм Ҡатарышта һөрөнтө һыҙаттың киңлеге арттырылған. Янғын майҙаны 320 гектарға етә. Ел бер аҙ тымған, аҙ ғына ямғыр яуған. Иртәгә, 13 июлдә, барлыҡ көстәр һәм янғынға ҡаршы көрәш мөмкинлектәре ирәнге 07.30 сәғәттә ҡаралып, әлеге йүнәлештәрҙә бүленәсәк.