Бөтә илдән 600 дәғүәсене уҙып, “Инмаш” концерны (Стәрлетамаҡ ҡалаһы) яуаплылығы сикләнгән йәмғиәтенең генераль директоры урынбаҫары Абдумалик Рәхимов “Йыл йәш сәнәғәтсеһе” премияһына лайыҡ булған ун еңеүсенең бишенсеһе булды. Йомғаҡ яһау һәм бүләкләү тантанаһы Екатеринбургта ИННОПРОМ-2023 халыҡ-ара күргәҙмәһендә уҙҙы. Сәнәғәт өлкәһендә Рәсәй наградаһын ил Хөкүмәте рәйесе урынбаҫары – сәнәғәт һәм сауҙа министры Денис Мантуров тапшырҙы. Премияны Рәсәй Сәнәғәт һәм сауҙа министрлығы ярҙамында “Йәш сәнәғәтселәр клубы” төбәк-ара союзы ойоштора. – Клубта ҡатнашыусылар даирәһе йылдан-йыл киңәйә. Беҙ был форматты биш йыл элек алты кешенән башлағайныҡ, хәҙер улар - 97. Ләкин ҡатнашыусылар артында торған, улар етәкләгән компанияларҙа, проекттарҙа эшләгән кешеләр һаны мөһимерәк. Һеҙҙең һәм коллегаларығыҙҙың 12 меңдән күберәк хеҙмәткәре – уникаль капитал, уны алдынғы продукттарға һәм технологияларға тупларға мөмкин һәм кәрәк. Әйҙәгеҙ, нимәлә ярҙам итә алыуыбыҙҙы ҡарап сығайыҡ. Башлыса бының өсөн клуб булдырылды ла инде, - тине Денис Мантуров. Ун еңеүсе иҫәбендә – “Инмаш” Стәрлетамаҡ машиналар эшләү концернының генераль директоры урынбаҫары Абдумалик Рәхимов. Башҡортостан Мәскәүҙән һуң ғаризалар һаны буйынса икенсе урын яулап, бөтәһе 11 кандидатураны премияға дәғүәләшеүгә тәҡдим итте. Дүрт идарасы “ТОП-100”-гә инде. Улар – “Яңы технологиялар” сәнәғәт етештереү предприятиеһы яуаплылығы сикләнгән йәмғиәте (йылылыҡ-энергетика комплексы өсөн ҡорамалдар етештереү), “СН-продукт” яуаплылығы сикләнгән йәмғиәте (һөт продукцияһы етештереү), “АНС” яуаплылығы сикләнгән йәмғиәте (металл изделиелар етештереү), “Инмаш” концерны яуаплылығы сикләнгән йәмғиәте предприятиелары вәкилдәре. – Эшҡыуарҙарыбыҙҙың инициативалы булыуы, федераль һәм республика кимәлендә дәүләт ярҙамы арҡаһында Башҡортостан сәнәғәт етештереүе индексы буйынса Волга буйы федераль округында алдынғы урынды биләй. Йыл һайын беҙҙең төбәк продукцияны тейәп оҙатыу күләмен дә арттыра. Бындай абруйлы милли награда – республикала үҙ эшенең ысын оҫталары эшләгәненә дәлил. Беҙ үҙебеҙҙең етештереүселәргә артабан да ярҙам итергә әҙербеҙ, – тине Хөкүмәт Премьер-министры урынбаҫары - сәнәғәт, энергетика һәм инновациялар министры Александр Шельдяев. Фото һәм сығанаҡ: Башҡортостан Хөкүмәте сайты.