Бөгөн Өфөлә Башҡортостан Башлығы Радий Хәбиров махсус хәрби операцияла ҡатнашыусыларға республиканың дәүләт наградаларын тапшырҙы. Төбәк етәксеһенең указдары менән генерал Шайморатовтың орден һәм миҙалдары менән мобилизацияланғандар һәм доброволецтарҙың хәрби хеҙмәттәре билдәләнде, улар әле тыуған төйәгенә ҡыҫҡа ваҡытлы ялға ҡайтҡан. Радий Хәбиров уларға тырыш хеҙмәттәре өсөн рәхмәт әйтте һәм республиканың хәрби хеҙмәткәрҙәргә һәм уларҙың ғаиләләренә тейешле ярҙам күрһәтеүен дауам итәсәген белдерҙе. – Бөгөн залда Салауат Юлаев исемендәге ирекле батальондың, “Барс” отрядтарының хәрби хеҙмәткәрҙәре һәм мобилизацияланғандар бар. Һеҙ әле фронт һыҙығында Тыуған илебеҙ, тыныс тормошто тергеҙеү өсөн алышҡан, ышанып тапшырылған участкаларҙа яуаплы эштәр башҡарған меңәрләгән яҡташыбыҙ өсөн илһамландырғыс миҫал булып тораһығыҙ. Республика һеҙҙең менән ғорурлана. Яугирҙәребеҙ ныҡышмаллығы, яралыларҙы ҡотҡарыуы, тыныс кешеләрҙе хәстәрлек күреүе менән ысын мәғәнәһендә ғорурлыҡ тойғоһо тыуҙыра, – тине ул. Радий Фәрит улы яугирҙәргә һәм уларҙың ғаиләләрегә, туғандарына һәм яҡындарына рәхмәт һүҙҙәрен еткерҙе. – Һеҙгә хәрби бурысты намыҫ менән үтәүегеҙҙе һәм тыуған Башҡортостаныбыҙға имен-аман әйләнеп ҡайтыуығыҙҙы теләйем! Мин һеҙгә ҡарайым һәм үҙем белгән егеттәрҙе күрәм. Бында – Салауат Юлаев исемендәге батальон доброволецтары. Һеҙҙең менән Донбасста нисек осрашҡаныбыҙҙы хәтерләйем. Командирҙарҙан һеҙҙең турала иң юғары баһаны ишеттем. Салауат Юлаев исемендәге батальонды Донбасста хәрби бурысын үтәгән Рәсәй гвардияһының иң яҡшы бүлексәләренең береһе тип атайҙар. Әлбиттә, был хөрмәт уята. Шуның өсөн алдығыҙҙа баш эйәм, – тине ул. – Беҙ егеттәребеҙ өсөн ныҡ борсолабыҙ. Үткән аҙнала мин Днепрҙа 55 километр оборона тотҡан полк командиры менән осраштым. Унда илебеҙгә тоғро хеҙмәт иткән, ҡыйыулыҡ һәм батырлыҡ күрһәткән Башҡортостан яугирҙәре хеҙмәт итә. Шуға күрә, әлбиттә, беҙ бөтә республика менән һеҙҙең өсөн янып-көйәбеҙ. Бөгөн бында туғандарығыҙ һәм яҡындарығыҙ, ҡатындарығыҙ, балаларығыҙ бар. Улар һеҙҙең, хөрмәтле хәрбиҙәребеҙҙең, доброволецтарҙың, ысын геройҙар икәнлегегеҙҙе күрә. Радий Хәбиров яугирҙәрҙе наградланы һәм Шайморатов исемендәге орден менән миҙалдарҙы ғорурлыҡ хиск менән йөрөтөүҙе һораны. МХО-ла ҡатнашыусылар Башҡортостан Башлығына, республика һәм муниципалитет етәкселәренә хәрбиҙәргә һәм яугирҙәр ғаиләләренә ярҙам иткәндәре өсөн рәхмәт белдерҙе. Салауат Юлаев исемендәге батальонға нигеҙ һалыусы Артур Йомағужин бөтә хәрби хеҙмәткәрҙәр исеменән төбәк етәксеһенә 1940 йыл өлгөһөндәге генерал ҡылысы тапшырҙы. – Бындай әхлаҡи һәм матди ярҙам өсөн республикаға рәхмәт белдерергә рөхсәт итегеҙ. Һеҙ беҙҙең ғаиләләр тураһында һәр ваҡыт хәстәрлек күрәһегеҙ, һәм беҙ бының өсөн тынысбыҙ. Ниндәй генә һорауҙар тыумаһын – һәр саҡ ярҙам бар. Гуманитар ылауҙар беҙгә килеп етә, бөтә кәрәкле нәмәләр менән тәьмин ителгәнбеҙ, – тине Артур Йомағужин. – Һеҙ үҙегеҙ гел, Радий Фәрит улы, беҙгә киләһегеҙ, йыш ҡына позицияларҙа булаһығыҙ. Һалдаттар һеҙҙе ихтирам менән – “Беҙҙең республика баш командующийы” тип атай. Һәм беҙ һеҙгә иҫтәлеккә ошондай генерал ҡылысы бүләк итергә ҡарар иттек. Фото: Башҡортостан Башлығы сайты.