Бөгөнгө көндә Нуғай — Өфөнөң әүҙем үҫешкән һәм йылдам төҙөлгән биҫтәләренең береһе. Торлаҡ фонды алты меңгә яҡын шәхси йортто тәшкил итә. Яҡын киләсәктә был һан кәмендә ике тапҡырға артыр тип көтөлә. Көн һайын меңәрләгән автоһәүәҫкәр тимер юл үткәүелендә тығындарҙа тора, ошо сәбәпле юл-транспорт ваҡиғалары йыш теркәлә. Был мәсьәләне хәл итеү өсөн әлеге ваҡытта бында "Хәүефһеҙ сифатлы юлдар" милли проекты тормошҡа ашырыла – транспорт сиселеше төҙөлә. Аҙаҡҡы этапта 1850 метр оҙонлоғондағы төп юлдың ситен төҙөү буйынса эштәр алып барыла. Ул дүрт, йәғни һәр йүнәлештә икешәр һыҙатҡа иҫәпләнгән. Юл "М5-Урал" федераль трассаһы менән киҫешкән ерҙән башлана һәм мәсет янында, Нуғай ауылынан сыҡҡан ерҙә, тамамлана. АСГ-ның 598 мең кубометры ҡойолған, был дөйөм һандың 97 процентын тәшкил итә. Диаметры 300-ҙән 500 миллиметрға тиклемге һәм оҙонлоғо 4,7 километр тәшкил иткән ямғыр һыуы өсөн канализация төҙөлә. Эшселәр биш километрлыҡ гранит бордюр һала, асфальт-бетондан тротуарҙың аҫҡы ҡатламдарын һала башлайҙар — бөтәһе 15 мең тонна ҡатнашма кәрәк. Тимер юл аша эстакаданың оҙонлоғо - 106, киңлеге 25 метр тәшкил итә һәм, төп юл кеүек үк, дүрт һыҙатҡа иҫәпләнгән. Өфө ҡалаһы хакимиәтенең төҙөлөш, юлдарҙы ремонтлау һәм яһалма ҡоролмалар буйынса идаралығы начальнигы Константин Паппе әйтеүенсә, уны төҙөү өсөн диаметры 1,2 метрлыҡ 56 бормалы ҡоролма ҡуйылған. — Эстакаданың дүрт терәге бар: был схема киләсәктә Нуғайҙың әле төҙөлөп бөтмәгән өлөшө өсөн тимер юлдың ике яғында ла уның аҫтында үткәүелдәр төҙөргә мөмкин булһын өсөн һайланған. Барлығы 320 тонна арматура ҡулланылған, 3,5 мең кубометр бетон һалынған. Эстакаданың дүрт арауығында оҙонлоғо 33 метр булған өҫлөктөң 36 бағанаһы ҡуйылған. Июль аҙағында юл төҙөүселәр асфальт һала башлай аласаҡ, — тине Константин Паппе. Асыҡ һауала яҡтыртыу өсөн заманса энергия һаҡлаусы лампалы 119 нығытма ҡуйыласаҡ. Транспорт саралары хәүефһеҙлеген тәьмин итеү өсөн биш километр шлагбаум урынлаштырыласаҡ. Көн һайын объектта 40 эшсе, 45 самосвал, 12 берәмек юл техникаһы йәлеп ителә. Автомобилдәр хәрәкәтен 1 сентябргә тиклем башлау планлаштырыла, ә эштәр тулыһынса 2023 йылдың ноябрь аҙағына тамамланасаҡ. Фото һәм мәғлүмәт Өфө ҡалаһы хакимиәте сайтынан алынды.