Россельхозбанк идараһы рәйесе урынбаҫары Денис Константинов Өфөлә Башҡортостан Республикаһы Хөкүмәте Премьер-министры урынбаҫары – ауыл хужалығы министры Илшат Фәзрахманов менән миҙгелле эштәр барышын тикшерҙе. Осрашыу Денис Константиновтың Башҡортостанда Рәсәй һәм Беларусь төбәктәренең X форумында ҡатнашыуы сиктәрендә ойошторолдо. Унда банктың топ-менеджеры Своё һанлы экосистемаһы мөмкинлектәрен күрһәтте. Башҡортостанда 2023 йылғы уңыш өсөн дөйөм сәсеү майҙаны 2 миллион 900 мең гектар самаһы тәшкил итте. Ғәҙәттәгесә, иген һәм ҡуҙаҡлы иген культуралары сәсеүлектәре 60 проценттан ашыу тәшкил иткән. Бер йыллыҡ мал аҙығы үләндәрен һәм шәкәр сөгөлдөрөн сәсеү майҙандары ярайһы ныҡ арттырылған. Илшат Фәзрахманов әйтеүенсә, республика аграрийҙары сәсеү кампанияһын уңышлы үткәрҙе. – Башҡортостан 2022 йылда хәҙерге Рәсәйҙең бөтә тарихында иң яҡшы һөҙөмтә күрһәткән ауыл хужалығы етештереүселәренең хеҙмәте менән ҡыйыу ғорурлана ала. Быйыл тағы ла юғарыраҡ үрҙәргә үрләүегеҙҙе теләйем. Банк яғынан Башҡортостан аграрийҙарына мөмкин тиклем күберәк ярҙам күрһәтеүебеҙҙе дауам итербеҙ, тип ышандыра алам. 2023 йыл башынан Россельхозбанк миҙгел эштәренә 2,3 миллиард һумдан ашыу аҡса бирҙе, был уҙған йылдың ошо уҡ осорондағы күрһәткестән 15 процентҡа күберәк, өҫтәүенә 90 проценттан ашыу кредит льготалы ставка буйынса рәсмиләштерелгән. Беҙ Башҡортостан агросәнәғәт комплексының төп партнеры булыуыбыҙға шатбыҙ, уға банк эше барышында 192,8 миллиард һум аҡса бирҙек, шул иҫәптән миҙгелле эштәр өсөн 22,8 миллиард һум, - тине Денис Константинов. – Миҙгелле баҫыу эштәрен башҡарыу өсөн аҡсаның төп сығанағы булып льготалы кредиттар булды һәм ҡала, – тине Илшат Фәзрахманов. – Бында Россельхозбанктың ролен билдәләү мөһим. Шулай уҡ банк ауыл ипотекаһы механизмын ғәмәлгә ашырыуҙа төп роль уйнай. Шуның арҡаһында Башҡортостан өсөнсө йыл рәттән ипотека биреү күләме буйынса алда бара. Займдар 4950 кешегә һәм уларҙың ғаиләләренә торлаҡ шарттарын яҡшыртырға ярҙам итте. Илшат Фәзрахманов шулай уҡ банк етәкселегенә әҙерләнгән цифрлы экосистема өсөн рәхмәт белдерҙе, ул республика фермерҙарына үҙ продукцияһын һатыу буйынса киң мөмкинлектәр бирә. Фото һәм сығанаҡ: Башҡортостан Хөкүмәте сайты.