Өфөлә X Рәсәй һәм Беларусь төбәктәре форумы сиктәрендә Башҡортостан Республикаһы Хөкүмәте һәм “Амкодор” асыҡ акционерҙар йәмғиәте – холдингтың идара итеүсе компанияһы Башҡортостан Республикаһының һәм Беларусь Республикаһының фәнни-техник һәм сәнәғәт потенциалы нигеҙендә ике яҡ өсөн дә файҙалы булған нигеҙҙе һаҡлау һәм үҫтереү маҡсатында хеҙмәттәшлек тураһында килешеүгә ҡул ҡуйҙы. Ҡул ҡуйыу Федерация Советы Рәйесе Валентина Матвиенко һәм Беларусь Республикаһы Милли йыйылышы Советы Рәйесе Наталья Кочанова ҡатнашлығында үтте. Килешеү төҙөү Башҡортостан Республикаһы менән Беларусь Республикаһы араһында сәнәғәт өлкәһендә мөнәсәбәттәрҙе әүҙемләштереүгә булышлыҡ итәсәк. – Башҡортостан өсөн “Амкодор” холдингы мөһим партнер булып тора, беҙҙең хеҙмәттәшлек бер нисә проект буйынса алып барыла. Шул рәүешле “Өфө” индустриаль паркында игенде урып-йыйыуҙан һуң эшкәртеү өсөн машиналар етештереү буйынса завод төҙөлөшө тамамланды. Завод базаһында ғилми-техник үҙәк ойоштороласаҡ, ул республикабыҙға яңы компетенциялар индерергә мөмкинлек бирәсәк. Бынан тыш, Өфөнөң Октябрь районында ауыл хужалығы, коммуналь һәм башҡа техниканы хеҙмәтләндереү буйынса производство-сервис үҙәге төҙөлә. Шулай уҡ беҙҙең хеҙмәттәшлек техника менән тәьмин итеү йәһәтенән дә үҫешә, – тине Андрей Назаров. 2022 йылда коммуналь техника һатып алыуға Башҡортостан Республикаһы бюджетынан 1 миллиард 432 миллион һум аҡса бүленде. Бюджет средстволары, майҙандарға һәм башҡарылған эш күләменә ҡарап, муниципаль берәмектәр араһында бүленде. Республика иҫәбенә йәмғеһе 239 берәмек техника һатып алынған, шуларҙың 132-һен Беларусь Республикаһы етештергән. 2023 йылда коммуналь техника паркын яңыртыу программаһы дауам итә. Лизинг килешеүе буйынса 200-ҙән ашыу яңы техника берәмеген һатып алыу өсөн техника һатып алыу механизмын эшләү планлаштырыла. Тәьмин итеүселәр сифатында Белоруссия етештереүселәре лә ҡарала. Фото һәм сығанаҡ: Башҡортостан Хөкүмәте сайты.