Ҙур ҡунаҡтар күргәҙмәне асты

Федерация Советы рәйесе Валентина Матвиенко, Беларусь Республикаһы Милли йыйылышы Советы Рәйесе Наталья Кочанова һәм Башҡортостан Башлығы Радий Хәбиров менән берлектә ике ил төбәктәренең Х форумы сиктәрендә Рәсәй һәм Беларусь халыҡ хужалығы ҡаҙаныштары күргәҙмәһен асты. Экспозицияла ике илдең ауыр һәм еңел сәнәғәте, фармацевтика индустрияһы, Белоруссияның химия һәм аҙыҡ-түлек сәнәғәте предприятиелары стендтары, шулай уҡ Рәсәй төбәктәре – Башҡортостан, Коми Республикаһы, Ҡарасәй-Черкес, Татарстан продукцияһы менән стендтар ҡуйылған. Валентина Матвиенко, Наталья Кочанова һәм Радий Хәбиров эре габаритлы ауыл хужалығы, юл, коммуналь һәм ҡар таҙартыу техникаһы күргәҙмәһе менән танышты. Унда КАМАЗ, МАЗа, Уралмаш, Ростсельмаш, Минск трактор заводы, Амкодор продукциялары ҡуйылған. Рәсәй һәм Белоруссия парламенттарының юғары палата башлыҡтары Башҡортостан Республикаһының һәм Беларусь Республикаһының берлектәге производствоһының “Горожанин” тәпәш иҙәнле троллейбусын ҡараны. Тиҙҙән ошондай 15 троллейбус Өфөлә маршрутҡа сығырға тейеш. Валентина Матвиенко уңайлы водитель креслоһын һәм юл хаҡын түләүҙең уңайлы системаһын үҙе баһаланы. Наталья Кочанова Рәсәй коллегаһына ике дәүләттең сәнәғәтенә инвентаризация үткәрергә, әлеге ваҡытта уңышлы эш алып барылыуын, ә Рәсәйҙә һәм Белорусияла ниндәй продукция етмәүен баһаларға тәҡдим итте. Валентина Матвиенко тәҡдимде хупланы. Улар шулай уҡ “Дуҫлыу урамы” этник мәҙәниәттәр фестивалендә рус, белорус һәм башҡорт ихаталарын ҡараны. Валентина Матвиенко менән Наталья Кочанова ҡатнашлығында сауҙа-иҡтисади, фәнни-техник һәм социаль-мәҙәни хеҙмәттәшлек тураһында ике Килешеүгә ҡул ҡуйылды. Улар - Беларусь Республикаһы һәм Бүрәт Республикаһы Хөкүмәттәре, шулай уҡ Беларусь Республикаһы һәм Тыва Республикаһы араһында, 2023-2025 йылдарға Башҡортостан Республикаһы Хөкүмәте менән Витебск өлкә башҡарма комитеты араһында сауҙа-иҡтисади, фәнни-техник һәм гуманитар өлкәләрҙә хеҙмәттәшлек тураһында Килешеүҙе тормошҡа ашырыу буйынса саралар планы, Башҡортостан Республикаһы Хөкүмәте менән Гроднен өлкә башҡарма комитеты араһында 2024-2027 йылдарға иҫәпләнгән сауҙа-иҡтисади, фәнни-техник, социаль һәм мәҙәни өлкәләрҙә халыҡ-ара һәм тышҡы иҡтисади бәйләнештәрҙе тормошҡа ашырыу тураһында килешеүҙе тормошҡа ашырыу буйынса саралар планы, Башҡортостан Республикаһы Хөкүмәте менән Амкодор араһында ниәттәр тураһында килешеү, Башҡортостан Республикаһы Хөкүмәте менән Минск ҡала башҡарма комитеты араһында дәүләт һәм муниципаль хеҙмәттәр күрһәтеү өлкәһендә тәжрибә уртаҡлашыу ниәттәре хаҡында меморандум. Форумдың төп темаһы – “Рәсәй һәм Беларусь төбәктәре форумының 10 йыллығы: йомғаҡтар һәм перспективалар”. Ойоштороусылар булып Федерация Советы, Беларусь Республикаһы Милли йыйылышы Советы һәм Башҡортостан Республикаһы Хөкүмәте сығыш яһай. Форумда Рәсәй Федерацияһының 57 төбәге һәм Беларусь Республикаһының бөтә өлкәләре күрһәтелгән. Хеҙмәттәшлек тураһында бөтәһе 100-ҙән ашыу документҡа ҡул ҡуйыу көтөлә. Фото: Башҡортостан Башлығы сайты.