Калуга ҡалаһына - “Ҙур гастролдәр” менән

Калуга ҡалаһының өлкә драма театры сәхнәһендә Башҡортостандың Дәүләт академик рус драма театрының “Ҙур гастролдәр”е оло уңыштар менән үтте! Рәсәйҙең иң оло театрҙарының береһендә коллектив бер-береһенә оҡшамаған, әммә халыҡҡа барыһы ла берҙәй оҡшаған спектаклдәр күрһәтте. Калуга халҡы бер нисә көн буйына Ким Брейтбургтың “Голубая камея” мюзиклын, Александр Островскийҙың “Бешеные деньги” комедияһын, Ярослав Пулиновичтың “Свой путь” драмаһын, Александр Володиндың “Фабричная девчонка” лирик тарихын яратып ҡараны. Гастроль сәфәренә Дәүләт академик рус драма театрының барлығы 70 кеше, декорацияларҙы алып йөрөргә өс йөк фураһы сыҡҡан. Бындай масштаблы гастролдәр Рәсәй Мәҙәниәт министрлығының Бөтә Рәсәй гастроль-концерт планына ярашлы РОСКОНЦЕРТ федераль мәҙәниәт учреждениеһы тарафынан тормошҡа ашырылған. Әлбиттә, бындай ҙурлыҡтағы саралар тамашасының әүҙемлегенән һәм театрға булған һөйөүенән тора. Шуға ла, Рус театры был йәһәттән спектаклдәре бер нисә көн рәттән тулы аншлагта үтеүе менән бәхетле. Был әҫәрҙәр араһында “Бешеные деньги” үҙенең “билет һатылыу буйынса лидер” булыуы менән айырылып тора. Сөнки был ҡалала классик әҫәрҙәргә һәр саҡ өҫтөнлөк бирелә икән. Бигерәк тә уның авторы Александр Островскийҙың тыуыуына 200 йыл булыу ҙа ҙур роль уйнағандыр. Ни тиһәң дә, театрҙы һәм ысын сәнғәт өлгөләрен яратыусы халыҡ йәшәй Калуга ҡалаһында. Әйткәндәй, Дәүләт академик рус драма театры был ҡалала һуңғы тапҡыр 1986 йылда булған икән. Был көндәргә тиклем, әлбиттә, күп нәмә үҙгәргән, әммә ҡаланың һәм уның халҡының йылы мөнәсәбәте генә шул уҡ, тине гастролдән ҡайтыусылар. Әлбиттә, уларҙың барыһына ла ҡаланың тарихи урындарына сәйәхәт тә, аяғүрә баҫып овация булдырған ҡала халҡы ла бик оҡшаған! Ә инде, быйылғы миҙгелдәрен ошондай юғары ноталарҙа тамамлаған театр коллективы инде ҙур илһам һәм дәрт менән киләһе 162-се театр миҙгеленә ҙур әҙерлек башларға ла тора. Сөнки яңы миҙгел режиссер Игорь Селин ҡуйған “Горе от ума” спектакленең премьераһы менән башланасаҡ һәм унда бар труппа менән ҡатнашасаҡтар. Ышанам, өфөләргә лә был оҡшар! Фотолар: Башҡортостандың Дәүләт академик рус драма театрының матбуған хеҙмәтенән.