"Хәтер поезы" проекты артабан да үҫәсәк

27 июндә Өфөлә X Рәсәй һәм Беларусь төбәктәре форумы барышында Рәсәйҙең Федерация Советы Рәйесе Валентина Матвиенко, Беларусь Республикаһы Милли йыйылышы Советы Рәйесе Наталья Кочанова һәм Башҡортостан Башлығы Радий Хәбиров Бөйөк Ватан һуғышына арналған “Хәтер поезы” патриотик проектында ҡатнашыусылар менән осрашты. “Хәтер поезы”н булдырыу тәҡдиме менән Рәсәй һәм Беларусь парламенттарының юғары палаталары башлыҡтары сығыш яһаны. Быйыл проект икенсе тапҡыр уҙғарыла һәм Рәсәйҙән, Белоруссиянан, Әрмәнстандан һәм Ҡырғыҙстандан 200-ҙән ашыу уҡыусыны берләштерҙе. Улар Рәсәй һәм Беларусь биләмәһендә Бөйөк Ватан һуғышы тарихына бәйле иҫтәлекле урындарға килә. – Һеҙгә бәхет йылмайҙы, һеҙ икенсе “Хәтер поезы”нда ҡатнаштығыҙ. Беренсе проект Рәсәй һәм Беларусь уҡыусыларын үҙ эсенә алды. Ә бөгөн уларға Әрмәнстан һәм Ҡырғыҙстан йәштәре ҡушылды. Артабан да “Хәтер поезы”ның сиктәрен киңәйтербеҙ, тип хәл иттек, – тине Валентина Матвиенко. Федерация Советы рәйесе шулай уҡ X Рәсәй һәм Беларусь төбәктәре форумы сараларын ойоштороу кимәлен юғары баһаланы. – Республика Башлығы Радий Хәбиров һәм уның командаһы әлеге Төбәктәр форумы иң күләмлеһе булһын өсөн барыһын да эшләне. Һәм һеҙҙең был көндәрҙә Өфөлә булыуығыҙ Союз дәүләте сиктәрендәге ҙур мөһим эштең бер өлөшө булып тора, - тип өҫтәне Валентина Матвиенко. – Беҙ форумдың бер нисә сараһында булдыҡ. Әйтергә кәрәк, Башҡортостанда кешеләр бик асыҡ һәм алсаҡ. Өфө һеҙгә лә оҡшар, тип ышанам. Сөнки республика Башлығының һәм уның командаһының ҡаланы һәм төбәкте үҫтереү өсөн күп эштәр башҡарыуы баһалап бөткөһөҙ. Өфө – үҫешкән инфраструктуралы һәм йәшәү өсөн уңайлы шарттар булдырылған заманса ҡала. Ул илебеҙҙең иң матур ҡалаларының береһе. Белорус парламентының юғары палатаһы спикеры Наталья Кочанова коллегаларына берлектәге эше өсөн рәхмәт әйтте һәм проект артабан да үҫтереләсәгенә ышаныс белдерҙе. – Һеҙ, беҙҙең һоҡланғыс йәштәр, бөгөн бында, Өфөлә, Төбәктәр форумы сараларында, ҡатнашыуығыҙ символик мәғәнәгә эйә, – тип билдәләне Наталья Кочанова. – Был проекттың килеп сығыуына бик шатбыҙ. Һәм беҙ барыһын да булдыра алғаныбыҙҙы аңлайым. Беҙ бергә булғанда, берҙәм. Радий Хәбиров үҙенең сәләмләү һүҙендә балаларға Башҡортостанда булыуҙарын хәтерҙә ҡалырлыҡ булһын тип теләне һәм илһөйәрлек тәрбиәһендә айырым урын биләгән “Хәтер поезы” проектына ярҙам итеүен белдерҙе. – Йәштәр менән аралашҡанда һәр саҡ әйтәм – һеҙ, моғайын, иң яҡшы быуындың береһелер, – тине төбәк етәксеһе. – Ваҡыты еткәс, һеҙ дәүләттәребеҙҙең – Рәсәй, Беларусь, Әрмәнстан, Ҡырғыҙстандың үҫеше өсөн яуаплы буласаҡһығыҙ. Шуға күрә бөгөн беҙҙең менән булғанығыҙ өсөн рәхмәт. Осрашыуҙан һуң Валентина Матвиенко, Наталья Кочанова һәм Радий Хәбиров балалар менән бергә Рәсәй Геройы, генерал-майор Миңлеғәле Шайморатов һәйкәленә сәскәләр һалды. Фото: Башҡортостан Башлығы сайты.