Ике илдең сауҙа-сәнәғәт палаталары артабан нисек эшләр?

Башҡортостан Республикаһының баш ҡалаһында “Торатау” конгресс-холы майҙансығында Рәсәйҙең һәм Беларусь Республикаһының сауҙа-сәнәғәт палаталары ике илдең эшлекле даирәләре хеҙмәттәшлеген үҫтереүҙең перспективалы йүнәлештәре темаһын тикшерҙе. Ике ойошма вәкилдәренең мөһим осрашыуы ошо көндәрҙә Өфөлә барған X Рәсәй һәм Беларусь төбәктәре форумы сиктәрендә уҙҙы. Сарала ҡатнашыусыларға тәбрикләү һүҙе менән Рәсәйҙең Сауҙа-сәнәғәт палатаһы президенты Сергей Катырин мөрәжәғәт итте. – Бөгөн беҙ иҡтисадты, ғаилә бизнесын үҫтереүгә ҡағылышлы бер нисә мәсьәләне тикшерергә теләр инек, – тине ведомство етәксеһе. – Минеңсә, былтыр үҙ-ара тауар әйләнеше ҡарашынан яҡшы күрһәткестәргә өлгәштек. Быйыл беренсе кварталда тағы ла йылдамыраҡ булған үҫеш ҡыуандыра. Сергей Катырин Форумды Башҡортостанда уҙғарыуҙың мөһимлеген билдәләне, сөнки дәүләттәрҙең төп тормошо нәҡ төбәктәрҙә тупланған. Белоруссия сауҙа-сәнәғәт палатаһы рәйесе Михаил Мятликов Рәсәй Федерацияһының һәм Башҡортостан Республикаһының Сауҙа-сәнәғәт палатаһы етәкселегенә ҡунаҡсыллыҡ күрһәткәне өсөн рәхмәт белдерҙе. Төбәк-ара хеҙмәттәшлек сиктәрендә йыл һайын эшлекле бәйләнештәр һәм тәҡдимдәр менән алмашыу мөмкинлеге биргән бик күп саралар уҙғарыла, тип билдәләне ул. Рәсәй парламентының юғары палатаһында Башҡортостан Республикаһынан сығыш яһаусы, Федерация Советының Иҡтисади сәйәсәт буйынса комитеты рәйесе урынбаҫары Ирек Ялалов Рәсәй һәм Беларусь эшлекле даирәләре хеҙмәттәшлеген үҫтереү кәрәклеге хаҡында һөйләне. – Илебеҙ өсөн заман саҡырыуҙарына, шул иҫәптән көнбайыш санкцияларына яуап итеп, беҙ стратегик тәғәйенләнештәге координация сараларын әҙерләнек, уларҙы, тәү сиратта, Рәсәй һәм Беларусь потенциалын нығытыуға һәм Союз дәүләттәрен артабан үҫтереүгә йүнәлттек, – тине сенатор Ирек Ялалов. Атап әйткәндә, һүҙ илдәр араһында сауҙа ҡаршылыҡтарын кәметеү, хужалыҡ-иҡтисади сылбырҙарын үҫтереү өсөн дөйөм баҙарҙар һәм шарттар булдырыу хаҡында бара. Беларусь Республикаһы Милли йыйылышы Советының иҡтисад, бюджет һәм финанстар буйынса даими комиссияһы рәйесе Татьяна Рунец бөгөнгө осрашыуҙың дәүләт власы органдары, бизнес, эксперттар, киң мәғлүмәт саралары вәкилдәрендә ҙур ҡыҙыҡһыныу уятыуын билдәләне. Был сараның актуаллеген һәм кәрәкле булыуын раҫлай. Ул шулай уҡ ике ил төбәктәрендә бәләкәй һәм урта эшҡыуарлыҡты үҫтереүҙең мөһимлеген һыҙыҡ өҫтөнә алды. Татьяна Рунец форумда ҡатнашыусыларға ҡыҙыҡлы һәм конструктив дискуссиялар теләне. – Бизнес өсөн көнүҙәк мәсьәләләр буйынса фекер алышыу һәр беребеҙ өсөн мөһим әһәмиәткә эйә булыр, тип ышанам, – тине ул. Башҡортостандың Сауҙа-сәнәғәт палатаһы президенты Тимур Хәкимов әйтеүенсә, Беларус Республикаһы – дәүләт партнеры. Ойошма башлығы шулай уҡ төбәк бизнесының үҫеше хаҡында һөйләне. – Башҡортостанда сәнәғәт йылдам үҫешә, республикала инвестицион үҫеш бара, бөтә предприятиелар ҙа тәьмин ителгән, - тип билдәләне Тимур Хәкимов. Ул һуңғы ике йылда Башҡортостандың сәнәғәтте үҫтереү өлкәһендә ил буйынса рейтинг лидеры булыуын һыҙыҡ өҫтөнә алды. Әммә предприятиеларға – кадрҙарға ҡытлыҡ менән осрашырға тура килгән проблемалар бар. Был йүнәлештә эш алып барыла. Атап әйткәндә, төбәк илдә беренселәрҙән булып хеҙмәткәрҙәрҙе йәлеп итеү өсөн миграция үҙәген асты. Бынан тыш, республикала ғаилә бизнесына ҙур ярҙам күрһәтелә. Ултырышта ҡатнашыусылар шулай уҡ тауар һәм хеҙмәттәр баҙарын формалаштырыуға ҡамасаулаған ҡаршылыҡтарҙы тикшерҙе. Ике илдең эшҡыуарҙары йыш ҡына өҫтәмә сертификациялау кәрәклеге арҡаһында килешеү төҙөй алмай. – Был мәсьәләне тикшереү һәм тейешле ҡарарҙар әҙерләү зарур, – тип билдәләне Белоруссия-Рәсәй эшлекле советының Рәсәй өлөшө рәйесе Александр Ястриб. “Газпром газ-мотор яғыулығы” яуаплылығы сикләнгән йәмғиәтенең генераль директоры Денис Корниенко транспортты газ-мотор яғыулығына күсереү кәрәклеге хаҡында һөйләне. - Был ысынлап та экологияны яҡшырта. Сығымдар кәмей, - тип билдәләне ойошма етәксеһе. Ултырыш аҙағында Рәсәй һәм Беларусь төбәктәре араһында бер төркөм үҙ-ара файҙалы килешеүҙәргә һәм контракттарға ҡул ҡуйыу тантанаһы үтте.