Башҡортостан Республикаһының баш ҡалаһында Рәсәй һәм Белоруссия төбәктәренең Х форумы сиктәрендә “Евразия йөрәге” фестивале старт алды. Алып барыусылар булып Рушана Бабич һәм Дмитрий Харатьян сығыш яһай. Опен-эйр “Шатлыҡ” ансамбленең хореографик постановкаһынан һәм “Splash” барабан шоуынан башланды. Һуңынан сәхнәгә Башҡорт дәүләт филармонияһының тынлы оркестры артистары сыҡты. Был ике дуҫ илдең мәҙәниәтен берләштергән етенсе фестиваль. Йола буйынса өс көн дауамында “Евразия йөрәге” конгресс-холы амфитеатрында Өфөләр һәм ҡала ҡунаҡтары төрлө музыка йүнәлештәре менән таныша аласаҡ. Фестивалдең беренсе көнө Совет һәм Рәсәй киноһы музыкаһы билдәһе аҫтында үтә. Башҡортостандан «Премьер», «Фэста», «Эхо Уфы» командалары, шулай уҡ опера һәм филармония солистары сығыш яһай. Программа төрлө музыкаль өҫтөнлөктәргә иҫәпләнгән. Мәҫәлән, «Республика» кавер-төркөмө Өфө балалары менән бергә совет йәнһүрәттәрендәге иң билдәле йырҙарҙы йырлай. Кисәнең хедлайнерҙары Лариса Долина һәм Дмитрий Харатьян. Улар, әлбиттә, таныштырыуға мохтаж түгел - уларҙы илдең бөтә мөйөштәрендә лә беләләр һәм яраталар. Тамашасылар байтаҡ килгән. Хатта болотло һауа торошо ла уларға байрамға ҡушылырға ҡамасауламай. 27 июндә “Евразия йөрәге” Башҡортостан Республикаһының Милли халыҡ уйын ҡоралдары оркестры сығышы һәм “Зәйнетдин” шоу-проекты менән дауам итәсәк. Бынан тыш, ҙур түңәрәк бейеү – Дуҫлыҡ Бейеүе көтөлә. Хәтерегеҙгә төшөрәбеҙ, уҙған йылдарҙа бындай хороводала 3 меңдән ашыу кеше ҡатнашты. Сәхнәләге төп шоу - «Славян баҙары» музыкаль проекты, ул ғәҙәттә Белоруссияла үтә. Әммә форум ярҙамында майҙансыҡ Өфөгә күсерелде. Кисәнең хедлайнерҙары-билдәле белорус коллективы “Песняры” һәм Таисия Повалий. Хәтерегеҙгә төшөрәбеҙ, 2023 йылдың 26 июнендә Өфөлә Рәсәй һәм Белоруссия төбәктәренең X юбилей Форумы үҙ эшен башланы. Күләмле сара 28 июнгә тиклем дауам итәсәк.