Александр Карелин төҙөлөш барышын ҡараны

26 июндә Рәсәй һәм Беларусь төбәктәренең Х форумы барышында Рәсәй Федерацияһы Федераль Йыйылышының Халыҡ-ара эштәр буйынса Федерация Советы комитеты ағзаһы, грек-рим көрәше буйынса өс тапҡыр Олимпия уйындары еңеүсеһе Александр Карелин Халыҡ-ара спорт көрәше үҙәгенең төҙөлөш майҙансығында булды. Был – Башҡортостан Республикаһының баш ҡалаһында уның 450 йыллығына төҙөлгән төп юбилей объекттарының береһе. Юбилей 2024 йылда билдәләнәсәк. Халыҡ-ара спорт көрәше үҙәге Муса Гәрәев, архитектор Рехмуков, Рудольф Нуриев һәм Комсомол урамдары менән сикләнгән кварталда төҙөлә. Боронғо Грецияны хәтерләткән биш ҡатлы бинаның дөйөм майҙаны 28 мең квадрат метр тәшкил итә. Бина бер нисә зонаға бүленгән. Улар – тамашасылар өсөн трибуналар, спорт-күнекмә комплексы, йәмәғәт туҡланыуы блогы, ҡунаҡхана һәм ер аҫты паркингы. Бында бөтәһе һигеҙ спорт залы, шул иҫәптән 3400 урынлыҡ универсаль спорт-концерт залы була. Александр Карелин төҙөлөп ятҡан үҙәктең спорт һәм ирекле көрәш, дзюдо, самбо, милли көрәш, көнсығыш көрәш буйынса халыҡ-ара кимәлдәге ярыштар үткәрергә мөмкинлек биреүен һыҙыҡ өҫтөнә алды. Уның һүҙҙәренсә, проекттың масштабтарына һәм төҙөүселәрҙең заманса архитектура һәм дизайнер ҡарарҙарын эстетик яҡтан файҙалана алыуына хайран ҡалған. Шулай уҡ танылған спортсы киләсәктә йәштәрҙе уҡытасаҡ һәм уларға спорт үрҙәренә өлгәшергә ярҙам итәсәк профессиональ кадрҙар һайлауҙың мөһимлеге тураһында иҫкә төшөрҙө. – Бында көс урыны. Объектты иң ҙур һәм амбициялы объект тип атарға мөмкин. Ләкин иң мөһиме, төҙөлөп ятҡан спорт үҙәгенең бөтә залдарын да балалар тултырырға тейеш. Асыу көнөндә килергә йыйынам. Радий Фәрит улы Хәбиров, Рәсәйҙең Спорт көрәше федерацияһы менән дә килешеүҙәр бар. Шуны билдәләп үткем килә: Башҡортостан һәр саҡ мөһим спорт ярыштарын үткәреү бурысын үҙ өҫтөнә ала. Бының өсөн мин республика Башлығына һәм Спорт министрлығына рәхмәтлемен, - тип билдәләне Александр Карелин. Республиканың Спорт министры Руслан Хәбибов әйтеүенсә, әлеге ваҡытта спорт комплексы 28 процентҡа әҙер. Уны төҙөү эшендә 190 кеше һәм 11 берәмек техника йәлеп ителгән. Сарала шулай уҡ абруйлы ҡунаҡтар, Дәүләт Думаһы депутаты, “Бөтә Рәсәй мәктәп спорты федерацияһы” асыҡ акционерҙар йәмғиәте президенты һәм фигуралы шыуыу буйынса күп тапҡыр олимпия чемпионы Ирина Роднина, олимпия чемпионы, баскетбол буйынса СССР-ҙың атҡаҙанған спорт мастеры Иван Едешко һәм Паралимпия уйындарының 13 тапҡыр чемпионы Рима Баталова ҡатнашты. Ирина Роднина Башҡортостан Республикаһы Хөкүмәтенә йылы ҡабул иткәндәре өсөн рәхмәт әйтте һәм 2024 йылда Халыҡ-ара спорт көрәше үҙәген асыу тантанаһында ҡатнашырға вәғәҙә итте. Айрат Нурмөхәмәтов фотоһы.