Бөгөн баш ҡалабыҙҙа бик күп саралар үтә. Шуларҙың береһе Х Рәсәй һәм Беларусь төбәктәре форумы сиктәрендә “Дуҫлыҡ балаҫы” милли мәҙәниәттәр фестивале. Туғандаш дәүләттәр халыҡтарының ихаталары М. Ғафури исемендәге Башҡорт академия драма театрынан Карл Маркс урамы киҫелешенә тиклем Зәки Вәлиди урамында урынлашҡан. Баш ҡала халҡы һәм ҡунаҡтары Рәсәй һәм Белоруссия халыҡтарының милли колориты һәм мәҙәниәте менән яҡынданыраҡ таныша аласаҡ. Шулай уҡ был көндәрҙә фестиваль майҙансығында ике ил төбәктәренең ижади коллективтары сығыш яһай. “Дуҫлыҡ урамында” Өфө кешеләре һәм ҡунаҡтары Башҡортостандың Халыҡтар дуҫлығы йорто тәҡдим иткән үҙенсәлекле проект – “Дуҫлыҡ балаҫы” менән таныша аласаҡ. Ул “Ағиҙел” башҡорт художество кәсептәре предприятиеһы һәм башҡорт балаҫ һуғыу оҫталары ҡатнашлығында республиканың тарихи-мәҙәни үҙәктәре хеҙмәткәрҙәре тарафынан ойошторолған һәм Дуҫлыҡ Тирмәһендә урынлашҡан. Күләмле ковер Башҡортостан биләмәһендә йәшәгән халыҡтарҙың традицион биҙәктәре һәм халыҡ орнаменттары фрагменттары менән байытылған. Көндөҙ Дуҫлыҡ Тирмәһендә балаҫ һуғыу буйынса оҫталыҡ дәрестәре үткәреләсәк, ә кискеһен ҡунаҡтар өсөн махсус мультимедиа шоуы тәҡдим ителәсәк, унда милли уйын ҡоралдары көйө аҫтында халыҡтарҙың милли орнаменттарына “йән инәсәк”. Был музыка халыҡ уйын ҡоралдары ансамбле тарафынан был проект өсөн махсус яҙылған. – Ҙур юбилей форумында Башҡортостандың күп милләтле халҡы исеменән сығыш яһау беҙҙең өсөн оло хөрмәт. Бында беҙ бер-беребеҙ менән тығыҙ торабыҙ, белорус халыҡтары мәҙәниәте менән танышабыҙ һәм шул уҡ ваҡытта үҙебеҙҙең үҙенсәлекте күрһәтәбеҙ. Беҙ 21 быуатта юғары технологиялар дәүерендә йәшәйбеҙ, әммә шуға ҡарамаҫтан, халыҡтарыбыҙ традицион ҡиммәттәрҙе һәм ғөрөф-ғәҙәттәрен һаҡлай. Шул рәүешле беҙ үҙебеҙҙең милли кодты ла һаҡлайбыҙ, – тине Башҡортостан Республикаһының Халыҡтар дуҫлығы йорто директоры Флүзә Ғайсина. Билдәләп үтәбеҙ, “Дуҫлыҡ урамы” милли мәҙәниәттәр фестивале 26-28 июндә иртәнге сәғәт 10-дан киске 10-ға тиклем эшләй. Фото: "Башинформ".