“Көтөгөҙ, беҙ ҡайтырбыҙ!”

Махсус хәрби операцияға улдарын оҙатҡан атай-әсәйҙәр өсөн дә ғәзиздәрен көтөү ҙур һынау. Баҡалы районына эш сәфәре менән барғанда Иҫке Ҡорос ауылында ошондай сабыр әсәйҙәрҙең береһе Әлфиә Исхаҡова менән күрештек. Үткән йылдың сентябрендә улы махсус хәрби операцияға мобилизацияланған. Улы бала саҡтан ауырлыҡтар алдында ҡурҡып тормаған ысын ир-егет булып үҫә. Ваҡыты еткәс армияға барып танк ғәскәрҙәрендә хәрби хеҙмәтен үтәп ҡайта. Махсус хәрби операция башланғас та, ул һис икеләнеүһеҙ ил саҡырыуы буйынса китә. – Илгә хеҙмәт итеү ир баланың бурысы. Улым да алдан уҡ үҙен әҙерләне, повестканы ла көтөп һорашып торҙо. “Әсәй, повестканы алдым. Мин китәм!“ тигәс, уның ҡарарына мин дә, атаһы ла риза булдыҡ. Егет кеше булғас, барырға тейеш, тип уйланыҡ. Балаһының, беҙҙең бәхеткә иҫән-һау әйләнеп ҡайтһын. Ауылда мәсет алдына барса халыҡ йыйылып, махсус хәрби операцияға юлланыусы егеттәрҙе күмәкләп доғалар уҡып оҙаттыҡ. Февраль айында улым отпускыға ҡайтып китте. Һағынып көтөп алдыҡ уны. Ялдан һуң да хеҙмәттәштәре янына ашҡынды. “Беҙ генә түгел, бүтәндәргә лә ялға ҡайтырға кәрәк, уларҙы ла көтәләр”, - тип ҡабат махсус хәрби операция урынына юлланды. Унан бер зарланыу һүҙе ишетмәнек. “Әсәй, барыһы ла һәйбәт, хафаланма", ғына тине. Бында ялға ҡайтҡас “Апаҡайҙар” клубындағы ҡатын-ҡыҙҙар менән уларҙы клубҡа осрашыуға саҡырҙыҡ. Улай ғына түгел яугирҙәрҙең ата-әсәләрен айырым дә байрам менән ҡотлап, уларға иғтибар күрһәтәбеҙ, – тине әлеге көндә мәҙәниәт йортонда “Апаҡайҙар” клубы етәксеһе лә булып эшләүсе Әлфиә Ғилмизакир ҡыҙы. Улы өсөн эстән генә йөрәге өҙгөләнһә лә, ут йотоп йәшәһә лә, сабыр булырға тырыша әңгәмәсем. Сөнки әсәйҙәргә бөгөн айырыса ныҡ булырға кәрәк. – Улым бәләкәй сағынан үткер булды. Һәр кем менән уртаҡ тел таба, һөйләшә белде. Кешелекле булғанғамы, үҙен башҡалар ҙа тыңлап, яратып торҙо, – тигән һүҙҙәрендә улына ҡарата ғорурлыҡ тойғолары сағыла. Ауыр сҡта халыҡтың да берҙәмлеге тойола. Яугирҙәргә посылкалар әҙерләгәндә лә бергәләшеп тырышалар. – Барлыҡ ауылдаштарыма, эшҡыуарҙарға рәхмәтлемен. Ныҡ ярҙам итәләр. Яугирҙәр нимә һорай, тиҙ генә кәрәкле ярҙам ойошторалар. Туҡмас, тушенкалар әҙерләп ебәрәбеҙ. “Әсәй, өй ризыҡтары ашап, өйгә ҡайтҡан һымаҡ булдыҡ” тип улым рәхмәт белдерә, – ти Әлфиә ханым. Әсәнең көнө-төнө теләгән теләге бер – балаһының иҫән һау әйләнеп ҡайтыуы. – Барлыҡ балалар иҫән-имен булһын. Ҡайғылар күрергә яҙмаһын. Ил тиҙерәк тынысланһын. Ҡайҙа ғына ҡөрьән ашына барһаҡ та, иң беренсе махсус хәрби операцияла йөрөгән балаларҙың иҫән-һау ҡайтыуҙарын теләйбеҙ. Баҡалынан ҙур автобустарға ултырып киткән саҡтарында улымдың автобус тәҙрәһенән башын сығарып бар тирә-яҡҡа “Беҙ ҡайтырбыҙ” тип ҡысҡырып хушлашҡаны әле лә күҙ алдында, – әсә кешенең был һүҙҙәрен тыңлағанда ирекһеҙҙән күңел тула. 37 йыл мәктәптә уҡытыусы булып эшләгән, әлеге көндә Иҫке Ҡорос ауыл биләмәһенең ветерандар советы рәйесе Флидә Нуретдинова махсус хәрби операцияла йөрөгән уҡыусылары тураһында айырым бер йылылыҡ менән һөйләне: – Был уҡыусыларым уҡығанда уҡ аҡыллы, эшһөйөүсән, кешегә ярҙамсыл балалар булды. Һәр береһе лә беҙгә ҡәҙерле. Яугирҙәрбеҙгә генә түгел, уларҙың ата-әсәләренә ауылыбыҙ менән ҡулдан килгәнсә ярҙам итәбеҙ, – тип һөйләне уҡытыусы ветеран. Изге теләктәр тормошҡа ашһын. Иҫке Ҡорос ауылы егеттәренә үҙ аяҡтарында тыуған ерҙәренә ҡайтырға яҙһын. Автор фотоһы.