“Балам, шәл ситенең нисә телен бәйләнең?”

Стәрлетамаҡ районының Түбәнге Уҫылы ауылынан Рәмзиә Хөснетдинова менән Зәминә Вахитованы ауылдаштары ҡул эше оҫталары булараҡ белә. – Атай-әсәй ололар ине, шуға мине бәләкәйҙән эшкә өйрәтеп үҫтерҙеләр. Иң беренсе ойоҡбаш, бейәләй бәйләргә өйрәндем. 13-14 йәштә колхозда ла эшләй башланым, бала сағым хеҙмәт менән үтте, – тип һөйләй башланы үҙе тураһында Рәмзиә апай. Оҙаҡ йылдар фермала һауынсы булып эшләһә лә, буш ваҡыттарында ҡулынан бәйләме төшмәй. Әле 80 йәшкә етеп барғанда ла күҙҙең яуын алырлыҡ итеп таҫтамалдар сигә, үҙенең белгәнен йәштәргә лә ихлас өйрәтә. – Күҙем күргәндә, һаулығым булғанда ошолай клубҡа йөрөп, күргәҙмәләрҙә ҡатнашып күңелемә ял алам, – ти ул. Оло йәшкә етһә лә күҙлек кеймәүе менән дә һоҡландырҙы Рәмзиә апай. Икенсе оҫтабыҙ Зәминә Вәхитованың белгәне лә бик күп булып сыҡты. – Мин барлыҡ ҡул эштәре менән дә мауығам. Айырыуса шәл бәйләргә яратам. Үҙем Стәрлебаш районынан, беҙҙең төбәк шәл бәйләүселәре менән данлы. Әсәйем дә шәл бәйләне, ғүмер буйы фермала эшләгәс, минең менән ултырырға ваҡыты ла булмағандыр инде, шәл бәйләргә күрше апайҙан өйрәндем. Әле лә хәтерләйем бала саҡта, әсәйем эштән ҡайтып керер ҙә дәрес әҙерләүем менән ҡыҙыҡһыныуҙан алда “Балам шәл ситенең нисә телен бәйләнең?” – тиер ине. Зәминә апайҙың күргәҙмәгә ҡуйылған түрюрған тип аталған ҡул эше бигерәк тә үҙенсәлекле. – Борон һикеләргә ултырғандар. Шунда ошо түрюрғанды йәйгәндәр. Ул әле лә ҡулланыуҙа. Ҡунаҡ килгәндә, эскәмйәләргә йәйеп ҡуйһам, үҙенсә йәм биреп тора. Элекке ҡалған материалдарҙан бына тигән итеп түрюрған эшләп була, – ти әңгәмәсем. Бөгөнгө заман йәштәренә оло быуындан өйрәнәһе нәмәләр бар әле. Автор фотоһы.