Радий Хәбиров «Башҡорт аты» халыҡ-ара фестиваленең ойоштороу комитеты ултырышын үткәрҙе

24 июндә Республика йортонда Башҡортостан Башлығы Радий Хәбиров 2023 йылдың авгусында үтәсәк «Башҡорт аты» икенсе Халыҡ-ара башҡорт тоҡомло аттар фестивален әҙерләү буйынса ойоштороу комитеты ултырышын үткәрҙе. Хәтерегеҙгә төшөрәбеҙ, беренсе фестиваль 2022 йылдың июль аҙағында Баймаҡ районы биләмәһендә үткәрелгәйне. Ойоштороу комитеты ултырышында эшлекле, мәҙәни һәм спорт программаһы, ваҡиғалар майҙансыҡтарын әҙерләү, ведомство-ара эш итеү мәсьәләләре тикшерелде. Төбәк етәксеһе «Башҡорт аты»ның беренсе фестивале үҙенең актуаллеген һәм кәрәклелеген раҫланы тип һыҙыҡ өҫтөнә алды. Быйыл уны ойоштороу һәм вәкиллек кимәле һиҙелерлек артасаҡ. - Был башҡорт халҡының рухи-мәҙәни мираҫын, ата-бабаларыбыҙҙың спорт, көнкүреш һәм илһөйәрлек традицияларын, шулай уҡ быуындар күсәгилешлеген сағылдырған бик мөһим сара, - тип һыҙыҡ өҫтөнә алды Радий Хәбиров. - Бөтә саралар һәм объекттар ҙа сифатлы әҙер булырға тейеш. Башҡортостан Башлығы фестивалдең майҙансыҡтарын әҙерләргә ҡушты. Уны ойоштороу комитетының киләһе ултырыштарының береһендә тикшерергә ниәтләйҙәр. Радий Хәбиров шулай уҡ республика йәштәре һәм пенсионерҙары фестиваль майҙансыҡтарына барһын өсөн «Башҡортостанда оҙон ғүмерлелек» һәм «Мәктәп туризмы» республика проекттары программаларына төҙәтмәләр индерергә тәҡдим итте. Фото: Башҡортостан Башлығы сайтынан