Етенсе саҡырылыш Башҡортостан Дәүләт Йыйылышы – Ҡоролтай депутаттарын һайлауҙа “Берҙәм Рәсәй” партияһының дөйөм республика исемлеген “Берҙәм Рәсәй”ҙең төбәк бүлексәһе етәксеһе Радий Хәбиров, фехтование буйынса олимпия чемпионы Аделина Заһиҙуллина һәм махсус хәрби операция ветераны, гвардия прапорщигы, Батырлыҡ ордены һәм генерал Шайморатов ордены кавалеры Артур Ғәлиев етәкләне. Был ҡарар өсөн “Берҙәм Рәсәй”ҙең төбәк бүлексәһе конференцияһы делегаттары тауыш бирҙе. Алдан хәбәр итеүебеҙсә, Башҡортостандың Үҙәк һайлау комиссияһы сираттағы ултырышында Башҡортостан Республикаһы етенсе саҡырылыш Дәүләт Йыйылышы – Ҡоролтай депутаттарын һайлауҙы 2023 йылдың 10 сентябренә тәғәйенләне. Дәүләт Йыйылышы – Ҡоролтайға депутаттар биш йылға һайлана һәм 110 кешенән тора. 55 депутат бер мандатлы һайлау округтары буйынса һайлана (бер округ бер депутат), ҡалған 55 депутат берҙәм республика һайлау округы буйынса һайлау берләшмәләре тәҡдим иткән кандидаттар исемлеге өсөн бирелгән тауыштар һанына пропорциональ һайлана. Дәүләт Йыйылышы – Ҡоролтай депутаты итеп тауыш биреү көнөндә 21 йәше тулған һәм һайлау хоҡуғына эйә булған РФ гражданы һайлана ала. Фото: Башинформ.
Башҡортостанда "Берҙәм Рәсәй" партияһының дөйөм республика исемлеген Радий Хәбиров етәкләне
24 июня 202324 июн 2023
~1 мин