Халыкны диспансерлауга игътибар җитди!

Быел билгеле бер яшь төркеме гражданнарга профилактик медицина тикшерүе һәм диспансерлау үткәрүдә (шул исәптән тирәнәйтелгәннәрен) республиканың 74 медицина оешмасы катнаша. Профилактика чараларын үткәрүгә җәлеп ителгән мобиль күчмә комплексларның гомум саны, шул исәптән ел саен үткәрелә торган “Сәламәт республика – сәламәт төбәк” акциясе кысаларында, 86 берәмлек тәшкил итә. Башкортстан Башлыгы Радий Хәбиров рәислегендә атна саен үтүче оператив киңәшмәләрнең берсендә республиканың сәламәтлек саклау министры Айрат Рәхмәтуллин төбәк халкын планлы диспансерлау барышы турында сөйләде. Министр билгеләвенчә, халыкны профилактик чаралар белән колачлау максатыннан сәламәтлек саклау учреждениеләрендә эш көннәрендә – 08:00 сәгатьтән 20:00 сәгатькә кадәр, шулай ук шимбә көнне 16:00 сәгатькә кадәр профилактик тикшерүләр үткәрү эше оештырылган. 60 яшьтән өлкәнрәкләр өчен атна саен сишәмбе көнне 08:00 сәгатьтән 10:00 сәгатькә кадәр “Көмеш яшь сәгате” форматында диспансерлау үткәрелә. Республиканың медицина оешмаларында профилактик медицина тикшерүләрен һәм диспансерлауның беренче этабын узу бер көн эчендә оештырылган. 2023 елда профилактика чаралары кысаларында барлыгы 1485000 өлкән яшьтәге кешене тикшерү планлаштырыла. Бүгенге көндә максатчан күрсәткечкә ирешелә бара, 682630 кеше профилактик чаралар узган, бу – еллык планның 45,9 проценты. Шунысын да билгеләп үтәсем килә, 2024 елга профилактик тикшерүләр халыкның якынча 70 процентын колачларга тиеш, – дип ассызыклады Айрат Рәхмәтуллин.Тикшерү нәтиҗәләре буенча 129354 авыру очрагы беренче тапкыр ачыкланган. Бу, нигездә, кан әйләнеше системалары, сулыш органнары авырулары һәм башка социаль әһәмиятле авырулар. 2690 пациент өстәмә диагностик тикшеренүгә җибәрелгән, 30 меңнән артык пациентка шифаханә-курорт дәвалануы тәкъдим ителгән, 548 кеше югары технологияле ярдәм күрсәтү мәсьәләсен хәл итүгә юнәлтелгән. 2022 елдан республикада фельдшер-акушерлык пунктларында диспансерлауның беренче этабын үткәрү буенча пилот проекты кертелүен дә билгели министр. Диспансерлауның беренче этабын һәм профилактик медицина тикшерүләрен үткәрүдә, шул исәптән анкеталау, кан басымын үлчәү, гомум холестерин һәм кандагы глюкоза дәрәҗәсен тикшерүдә 1735 фельдшер-акушерлык пункты катнаша. Халыкны профилактик чаралар белән колачлау дәрәҗәсен арттыру максатыннан, фельдшерлары булмаган ФАПларда күчмә эш формалары актив кулланыла. Ел башыннан бирле ФАПларда диспансерлауның беренче этабын һәм профилактик медицина тикшеренүен 51093 кеше узган. – Русия Федерациясенең сәламәтлек саклау министры йөкләмәсе нигезендә 2023 елда хезмәт коллективларында (эре эш бирүчеләрдә) профилактика чараларын үткәрүне оештырырга, 40 яшьтән алып 65 яшькә кадәр эшкә яраклы яшьтәге кешеләргә аерым игътибар бирергә кирәк, – дип белдерде сәламәтлек саклау министры. – Бүгенге көндә предприятиеләрдә диспансерлауның беренче этабын 5287 кеше узды, шуларның 29 проценты икенче этапны узуга юнәлтелгән.Профилактик медицина тикшерүләре һәм диспансерлау үткәрү буенча эш дәвам итә. Айрат Рәхмәтуллин билгеләвенчә, кадрлар дефицитын бетерү максатыннан Башкорт дәүләт медицина университеты ректоры белән университет студентларын эшкә урнаштыру буенча хезмәттәшлек оештырылган.