Туризм өлкәһендә 16 инвестиция проекты ғәмәлгә ашырыласаҡ

Башҡортостан 2023-2024 йылдарҙа модулле капиталь булмаған урынлаштырыу сараларын – модулле ҡунаҡханалар, глэмпингтар һәм башҡа тиҙ төҙөлә торған конструкцияларҙы булдырыу буйынса инвестиция проекттарына ярҙам итеү өсөн субсидиялар биреүгә һайлап алыуҙа еңеүселәр иҫәбенә инде. “Туризм һәм ҡунаҡсыллыҡ индустрияһы” милли проекты сиктәрендә республика федераль бюджеттан 258,6 миллион һум аласаҡ. Аҡса туризм өлкәһендә 16 инвестиция проектын тормошҡа ашырыуға йүнәлтеләсәк. – Башҡортостан туристар өсөн тағы ла мауыҡтырғыс ял итеү урынына әйләнеп бара. Төбәккә туристар ағымы арта, Росстат мәғлүмәттәре буйынса, 2022 йылда ул 2,1 миллион кеше тәшкил итә. Республикала ялға ихтыяждың артыуы менән бәйле, тиҙ төҙөлә торған модулле ҡунаҡханалар, глэмпингтар һанын арттырыу, уларҙа булыу өсөн уңайлы һәм хәүефһеҙ шарттар булдырыу ихтыяжы бар. 16 ғариза еңеүсе тип танылды – был бик яҡшы һөҙөмтә һәм республиканың туристар өсөн тағы ла мауыҡтырғыс нөктәгә әйләнеүе өсөн мөһим аҙым, – тип билдәләне Башҡортостандың эшҡыуарлыҡ һәм туризм министры Рөстәм Афзалов. Конкурсҡа Рәсәйҙең 79 төбәге үҙ проекттарын тәҡдим иткән, Башҡортостан федераль субсидия алыусы 38 төбәк иҫәбенә инде. Берлектә финанслауҙың мотлаҡ шарттарына ярашлы, 16 проектты тормошҡа ашырыуға төбәк бюджетынан 390 миллион һум самаһы аҡса һәм инвесторҙарҙың үҙ аҡсаһы йүнәлтеләсәк. Ғаризаларға ярашлы, 2024 йылдың аҙағына тиклем республикала туристик объекттарҙың номерҙар фонды дөйөм алғанда 500 урынға артасаҡ. Хупланған проекттар араһында Шишмә районы биләмәһендә Башҡорт аты үҙәгендә глэмпингтар, Ишембай районында агро-туристик комплекс, Әбйәлил районында бөтә миҙгелдә глэмпинг төҙөү. Шулай уҡ Белорет, Ейәнсура, Иглин, Илеш, Нуриман, Стәрлетамаҡ, Туймазы, Шаран райондарында эшләп килгән туристик базаларҙа номерҙар фонды артасаҡ. Әбйәлил, Белорет, Ғафури, Ҡариҙел райондарында глэмпингтар киңәйә. Белешмә: 2021 йылдан эшләп килгән “Туризм һәм ҡунаҡсыллыҡ индустрияһы” милли проекты (национальный проект “Туризм и индустрия гостеприимства”) Рәсәй буйлап сәйәхәттәрҙе уңайлы, хәүефһеҙ һәм ҡыҙыҡлы итергә ярҙам итәсәк. Туристар сервис аласаҡ, ә ял итеү урындарын һәм туристик маршруттарҙы ойоштороусылар дәүләт ярҙамы аласаҡ. Милли проектҡа өс федераль проект инә: “Туризм өлкәһендә идара итеүҙе камиллаштырыу”, “Туристик хеҙмәттәрҙең асыҡлығын арттырыу” һәм “Туристик инфраструктураны үҫтереү”. Шулай уҡ был проекттар Рәсәй Президенты Владимир Путиндың май указдарыны ярашлы ҡабул ителгән "Хеҙмәт етештереүсәнлеген арттырыу һәм мәшғүллеккә ярҙам" милли проектын (национальный проект "Повышение производительности труда и поддержка занятости") ғәмәлгә ашырыуға ла этәргес булып тора. Фото һәм мәғлүмәт сығанағы: vk.com/mptrb