— Медицина хезмәткәрләре көне безнең һөнәри бәйрәмебез генә түгел, нәтиҗәләр ясау вакыты да, — диде министр. — Тармакны үстерүгә зур игътибар бүленә. Күптән түгел республика Башлыгы Затондагы яңа поликлиникада булды. Бу — уникаль проект. Гаилә сәламәтлеге, авыл медицинасы да төп игътибар үзәгендә. Айрат Рәхмәтуллин тантаналы чарага җыелган медицицина хезмәткәрләренә намуслы эшләре өчен рәхмәт белдерде, җылы теләкләрен җиткерде.Министр кулыннан 40 хезмәткәр бүләкләнде. Аларның алтысы “Башкортстанның атказанган табибы” исеме алды, калганнары “Русия Федерациясенең сәламәтлек саклау отличнигы” билгесенә лаек булды. Бүләкләнүчеләр арасында табиблар да, шәфкать туташлары да, сәламәтлек саклау тармагындагы төрле хезмәткәрләр бар. Мәсәлән, Рамил Батыршын - ашыгыч ярдәм станциясендә механик. Хезмәте бик җаваплы — тиз арада ашыгыч чакыруга кузгалырга, табибларны вакытында пациент янына алып барып җиткерергә тиешле автомобильнең төзеклеге өчен җавап бирә. Инде үз һөнәренең барлык нечкәлеләренә төшенгән ул — 2004 елдан бирле эшли. Гөлсара Агеева Уфаның 21нче дәваханәсендә җәрәхәтләрне бәйләүче шәфкать туташы. Бу дәваханәдә ул 40 ел эшли. Гомумән, медицинада стажы — 46 ел.— Бүген минем өчен бик истәлекле көн, хезмәт биографиямдә зур вакыйга, — ди Гөлсара ханым, шатлыгын яшермичә һәм медицинага килү тарыхын кыскача бәян итә. — Ырынбур өлкәсендә туып-үстем. Әнием - чыгыш белән Башкортстаннан. Ул безгә бәләкәйдән бу республика турында сөю белән сөйләде, шуңа яшьтән бирегә килдем. Республика клиник балалар дәваханәсендә очраклы гына санитарка булып эшли башлады. Бу тармакка эләккәч, медицина училищесына укырга кердем. Медицинага очраклы эләксәм дә, һөнәремне шунда ук яраттым һәм бу юнәлешне сайлаганга сөенеп бетә алмыйм. Альмира Елиусизова гомер буе Республика клиник сугыш ветераннары госпиталендә хезмәт сала. 1981 елда биредә травматология бүлегендә постта эшләүче шәфкать туташы булып башлаган һәм төрле хезмәт баскычлары үткән. Өлкән һәм баш шәфкать туташы булган, 2020 елдан клиник-эксперт эше бүлегендә эшли. Травматолог Иван Борисовның хезмәт стажы 30 елдан артык. Ул бүген Уфаның 8нче дәваханәсендә амбулатор-поликлиника эше буенча баш табиб урынбасары. Бу вазыйфага килгәнче зур тәҗрибә туплаган — 13нче дәваханәдә, Шакшада, Мәсәгутьтә, Уфадагы тимер юлчылар дәваханәсендә эшләгән.— Хезмәтемне бик яратам. Кешеләргә изгелек, шәфкатьлелек бүләк итү зур канәгатьлек бирә, — ди ул һәм шаяртып та ала. — Без, травматологлар, “ватылган” кешеләрне яңадан төзәтеп куябыз, кирәк булса, башны да муенга ялгый алабыз. Әйе, өзелеп барган гомерләрне ялгап җибәрүче, югалган сәламәтлекне кайтаручы бик әһәмиятле һөнәр ияләре шул ул медицина хезмәткәрләре. Без дә аларга уңышлар телик! Автор фотолары.