Һауа торошо һыуыҡ булһа ла, бесәнлек һәм баҫыуҙарҙа ҡара сиңерткәнең ҡанаттары нығыныуы күҙәтелә, тип билдәләй “Россельхозцентр” белгестәре. Был ҡара сиңерткәгә ҙур аралараға осорға мөмкинлек бирәсәк. Әйткәндәй, быйыл ҡара сиңрткәләр, былтырғы менән сағыштырғанда, бер айға иртәрәк ҡанатланған. - Артыҡ хәүефләнергә ярамай. Беҙҙең белгестәр тикшереүҙәр алып бара. Бер квадрат метр майҙанға 10-15 ҡара сиңерткә тура килһә генә, саралар күрергә кәрәк. Улар баҫыуҙағы үҫентеләргә зыян килтергән хәлдә генә баҫыуҙарҙа эшкәртеүҙәр үткәрергә кәрәк буласаҡ. Ҡара сиңерткә хәҙер сәсеүлектәргә һөжүм итмәй, көтөүлектәрҙә, бесәнлектәрҙә осрай, баҫыуҙарҙа күсенмәй. Хәҙер сәсеүлектәгә зыян килтереүе мөмкин булған фазаны үткән — уларға һутлы йәшеллек кәрәк. Иген дә, көнбағыш һәм кукуруз да үҫкән, япраҡтары ҙур, был ҡоротҡостар уларға зыян килтерә алмай. Тимәк, борсолорға урын юҡ. Шуның өҫтәүенә, һауа шарттары ҡара сиңерткәгә үҫешергә мөмкинлек бирмәй, - тип тынысландыралар идаралыҡта. Шулай ҙа уяу булырға кәрәк. Иҫкәртеү сараларын бер нисә көнгә һуңлатҡанда ла, ҡара сиңерткәнең аҙыуы ихтимал. Былтыр, мәҫәлән, Баймаҡ районында ҡара сиңерткә артыуы арҡаһында ғәҙәттән тыш хәл иғлан ителгәйне. Урал аръяғы райондары, Ҡаҙағстан Республикаһы менән сиктәш булғанға, күҙәтеү саралары даими үткәрелеп тора. фото: fb.ru