Күп балалы ғаиләләр түләүле уҡыған өсөн ташлама аласаҡ

22 июндә алтынсы саҡырылыш Башҡортостан Дәүләт – Йыйылышының депутаттары яҙғы сессиялағы һуңғы пленар ултырышында “Республикала күп балалы ғаиләләргә дәүләт ярҙамы тураһында”ғы законға үҙгәрештәрҙе ҡабул итте, ул яңы ташламалар индереү тураһында. – Яңы йылдан күп балалы ғаиләләрҙә яңы ташлама барлыҡҡа киләсәк. Әгәр күп балалы ғаиләләге бала түләүле мәктәптә уҡыһа йәки уның колледжда һәм юғары уҡыу йортонда уҡыуы түләүле булһа, республика бөтә уҡыу йылы өсөн түләүле белем биреүгә сығымдарҙың яртыһын бюджеттан ҡаплаясаҡ, әммә 30 мең һумдан артмаған суммала. Был льгота көндөҙгө бүлектә уҡыған 23 йәшкә тиклемгеләргә ҡағыла, – тип аңлатты республиканың ғаилә, хеҙмәт һәм халыҡты социаль яҡлау министры Ленара Иванова. Алтынсы саҡырылыш Дәүләт Йыйылышы - Ҡоролтайҙың йомғаҡлау пленар ултырышын парламент Рәйесе Константин Толкачев алып барҙы. Сараның көн тәртибенә 60-тан ашыу һорау ҡарауға сығарылды. Шул иҫәптән “Башҡортостан Республикаһында ауыл хужалығын үҫтереү һәм ауыл хужалығы продукцияһы, сеймал һәм аҙыҡ-түлек баҙарын көйләү” дәүләт программаһын 2022 йылда тормошҡа ашырыу йомғаҡтары тураһында доклад, шулай уҡ Башҡортостан Республикаһында бала хоҡуҡтары буйынса вәкилдең 2022 йылда Башҡортостан Республикаһында баланың хоҡуҡтарын, азатлыҡтарын һәм законлы мәнфәғәттәрен үтәү һәм яҡлау тураһында доклады тыңланды һәм тикшерелде. Депутаттар республика закондарының 40-ҡа яҡын проектын ҡараны. Был ултырышта Башҡортостан Башлығы Радий Хәбиров та ҡатнашты. Ултырышта ҡатнашыусылар Бөйөк Ватан һуғышы йылдарында һәләк булғандарҙы бер минут тынлыҡ менән иҫкә алды. Фото: /gsrb.ru/ru/press-center