Бөгөн ҡыҫҡа ваҡытлы отпускынан һуң Башҡортостандан Салауат Юлаев исемендәге ирекмәндәр батальоны яугирҙәре махсус хәрби операцияға юлланды. Йола буйынса, уларҙы оҙатыу тантанаһы “Өфө-Арена” спорт комплексы алдындағы майҙанда үтте. Республика Башлығы Радий Хәбиров исеменән яугирҙәрҙе Хөкүмәт Премьер-министры урынбаҫары Ирек Сәғитов сәләмләне. Башҡортостан Рәсәй Ҡораллы Көстәре командованиеһынан өлгөлө әҙерлеге, дисциплинаһы һәм юғары профессионализмы өсөн күп рәхмәт хаттары ала, тип һыҙыҡ өҫтөнә алды ул. – Бөгөн республика һәм бөтә ил һеҙҙең менән ғорурлана, сөнки һеҙ ҡатмарлы хәрби бурыстар үтәйһегеҙ, Ватаныбыҙҙы батырҙарса яҡлайһығыҙ. Һеҙ барыбыҙ өсөн дә ысын батырлыҡ һәм илһөйәрлек өлгөһө булып тораһығыҙ. Белегеҙ, егеттәр: һеҙ хеҙмәт иткәндә ғаиләләрегеҙ, туғандарығыҙ һәм яҡындарығыҙ хаҡында ҡайғыртасаҡбыҙ. Беҙ һеҙгә даими рәүештә кәрәкле бөтә нәмәне ебәрәбеҙ, гуманитар ярҙам күрһәтәбеҙ, социаль-көнкүреш мәсьәләләрен тиҙ арала хәл итәбеҙ. Белегеҙ, беҙ артабан да ошо тәү сираттағы бурыстарҙы үтәйәсәкбеҙ. Һеҙ хәрби бурысығыҙҙы намыҫ менән үтәп, өйҙәрегеҙгә иҫән-һау ҡайтырһығыҙ, тип ышанам. Ә беҙ һеҙҙе ысын геройҙар кеүек ҡаршыларбыҙ. Беҙ хаҡлыҡ юлында, еңеү беҙҙең ҡулда буласаҡ. Эшләгеҙ, туғандар, алға, Башҡортостан, алға, Рәсәй!”– тине Ирек Сәғитов. Яугирҙәр яҡындары эргәһендә ял итеп, яңы көс туплап, тағы ла Ватан һаҡларға юлланды. Ирекмән “Мелкий”: – Ялды ҡатыным һәм алты айлыҡ сабыйым менән үткәрҙем. Ял итеп, һауығып өлгөрҙөм, шуға күрә яңы көстәр менән дуҫтарым һәм иптәштәрем эргәһенә юлланам. Хеҙмәт итеү осоронда улар миңә яҡын кешеләр булып китте, – тип уртаҡлашты “Мелкий” исемен алған яугир. Тантана барышында взвод командирҙарын, төркөм начальниктарын, водителдәрҙе, разведчиктарҙы, пулеметсыларҙы һәм башҡа күп кенә хәрби хеҙмәткәрҙәрҙе Башҡортостан Башлығынан исемле бысаҡтар менән бүләкләнеләр. Фото һәм мәғлүмәт сығанағы: “Башинформ”.