Өфөлә бөгөн, 21 июндә, Совет майҙанында Шайморатов исемендәге ирекмәндәр батальонының ялға ҡайтҡан яугирҙәрен ҡаршы алдылар. Ҡаршыларға килгәндәрҙең күбеһе туғандарын бер йыл тиерлек күрмәгән, шуға күрә яугирҙар үҙҙәре лә, уларҙың ғаилә ағзалары ла был осрашыу бәхетенә ышанып бөтә алмай. “Ниндзя” исеме менән йөрөгән ирекмән мөһим маҡсат менән өйгә ҡайта: ул хеҙмәткә киткәндән һуң донъяға ауаз һалған балаһын күрмәгән. Салауат ҡалаһынан булған яугирҙең тағы ла үҫмер улы бар – ул бәхетле йылмайып, атаһынан бер аҙым да ситкә китмәй. "Минең ял итеү пландарым – улым менән аралашыу. Хәҙер ике улым бар: мин киткәндән һуң, тағы бер улым тыуҙы. Хәҙер, ниһайәт, уны күрәсәкмен. Өйгә ҡыуаныслы хистәр менән ҡайттым, быны һүҙ менән генә еткереү мөмкин түгел. Беҙ бик оҙаҡ йөрөнөк, әммә был юл еңел бирелде — Тыуған илгә юл һәр ваҡыт ҡыҫҡа”, – тип уртаҡлашты “Ниндзя”. Борай районынан Фирүзә И. ире менән осрашты. Йәш ғаиләгә айырылыу еңелдән булмай, әммә ҡатын иренең ҡарары менән ғорурланыуын белдерҙе. – Иремде бер йыл көттөм. Ул үҙ теләге менән китте, үҙе хеҙмәт итергә теләк белдерҙе. Бөгөн мин бөтә хис-тойғоларҙы бер юлы кисерәм: шатлыҡ, ғорурлыҡ. Бәләкәй ҡыҙыбыҙ ҙа атайҙың ҡайтыуына шатлана. Беҙ ғаиләбеҙ менән өйҙә ял итергә йыйынабыҙ, балалар менән аралашып, бергә ваҡыт үткәрәсәкбеҙ. Шулай уҡ ҡыҫҡа ваҡытҡа сәйәхәт итеп алырға ла теләк бар. Был көн минең өсөн иң бәхетлеһе, барлыҡ хис-тойғоларым буталды, иртәндән ҡыуанып йөрөйөм. “Бабай” исеме аҫтында йөрөгән яугир уйҙарын һәм кисерештәрен йәшерергә тырышты, үҙенең ысын һалдат булыуын күрһәтеп. Шул уҡ ваҡытта тыштан тыныс күренһә лә, эсендә тәрән хис-тойғолар йәшеренеүен таныны. – Кисерештәрҙе нисек әйтәһең инде... Беҙ бөтәбеҙ ҙә кешеләр, бөтәбеҙҙең дә йөрәге бар, беҙҙе туғандарыбыҙ көтә. Шуға ла Тыуған илгә ҡайтыу оло ҡыуаныс. Махсус хәрби операцияла бер йылға яҡын булдым. Әле беҙҙең батальондан 20 кеше ялға ҡайтты. Беҙҙе өйгә бик матур оҙаттылар, 15 көн ял итәсәкбеҙ. Яҡын кешеләрем менән осрашырға планлаштырам. Тыуған ергә аяҡ баҫыу ҙур ҡыуаныс, – тип билдәләне “Бабай”. Фото һәм мәғлүмәт сығанағы: gorobzor.ru/novosti/obschestvo/