Тӑшман мӗнпур хӗҫпӑшалӗпе вĕлерме тапӑнать.Тӑван ҫӗршывӑн арҫыннисем те мӗнпур хӗҫпӑшалӗпе хирӗҫ тӑраҫҫӗ. Вӗсем пӗр-пӗрин ҫине пӑхса тӑмаҫҫӗ, ҫав хӗҫпӑшалсенчен пуринчен те пӗр-пӗрне переҫҫӗ. Унта, паллах, вилмесӗр май ҫук.
Ӑслӑ Отечественный вӑрҫӑра миҫе миллион салтак пуҫне хунине пурте тенӗ пекех пӗлеҫҫӗ пулӗ тетӗп. Ҫавӑнпа та кашни салтаках вӑрҫа кайнӑ чухне хӑй вилме пултарассине лайӑх ӑнланса кайнӑ, каять те. Ҫавӑнпа куҫҫуль витĕр ӑсататпӑр вӗсене. Вӗсем те хурланса каяҫҫӗ. Никамӑн та вилес килмест, никамӑн та вӗлерес килмест. Анчах та самани ҫавӑн пек ҫаврӑнса ҫитсен алла хӗҫпӑшал тытма тиветех , унта вилесси те пулать. Салтаксем хăйсен вилӗмӗпе тӑшмана хирӗҫ хӗҫпӑшалпа тӑрайман ачасемпе хӗрарӑмсене, ваттисемпе сусӑррисене чӗрӗ хăварас тесе вилеҫҫӗ. Ҫак тӗрӗслӗхе ӑнланни пире паянхи кун та шутсăр кирлӗ. Майӑн 9-мӗшӗнче эпир иртнӗ Аслӑ вӑрҫӑра вилнĕ тата унта хутшăннă салтаксене аса илетпĕр, вӗсене тав тӑватпӑр, чун-чӗререн мухтатпӑр, вӗсем пек пуласчӗ тетпĕр. Ку вара - вӗсем пекех алла хӗҫпӑшал тытса хамӑрӑн ачасене, атте-аннесене, ытти тӑвансене, ялсемпе хуласене, ҫӗрӗсемпе шывӗсене хӳтĕлеме хатӗр пулмалли пĕлтерет.
Пурте пӗлетпӗр ӗнтӗ - паян та тӗлӗнмелле хаяр та хӑрушӑ вӑрҫӑ пырать. Унта та пирӗн ҫынсем вилеҫҫӗ. Вӗсем пире хӳтӗлеймесен - пирӗн, мирлĕ ҫынсен, вилме тивет. Тӑшман никама та каҫармасть, хӗрхенмест. Мана ку шӑпа ҫитмест теме ҫук. Ҫавӑнпа та ирӗксӗрех ҫара кайма тивет. Вилме пултарассине пӗлсех. Кам вилĕмрен хӑрать - вӑл е сутӑнчӑк, е таркăн пулса тăрать. Вӑн мӗн чухлӗ ҫамрӑк ҫӗршывран тухса тарчӗ. Кирлӗ-и вӗсем пирӗн халăха, ҫӗршыва?
Пур вӑрҫӑ та хӑҫан та пулсан чарăнать. Анчах та пӗрисем - ҫӗнтереҫҫӗ, теприсем - парӑнаҫҫӗ ҫав вӑрҫӑра. Пирӗн - ҫӗнтермеллех. Пурнӑҫ - ҫӗнтерӳре кӑна. Ҫак сӑваплӑ, аслӑ та кӗтнӗ кун хӑҫан тата хӑвӑртрах килесси - пирӗн шухӑш- кӑмӑл тӗрӗслӗхӗпе ҫирӗплӗхӗнчен, чӗресен харсӑрлӑхӗнчен, кӑмӑл хастарлӑхӗнчен, Тӑван Ҫӗршывпа унӑн ҫыннисене мӗнле юратнинчен килет. Пурин те, ӗлӗкхи пекех, пӗр пулмалла ҫак йывӑр вӑхӑтра.
Пур ҫын та Аслӑ Ҫӗнтерӳ кунĕнче иртнӗ вӑрҫӑра вилнĕ салтаксене асăнса лартнӑ ҫывӑхри палăксем умне чӗрӗ чечексем кайса хурасса шанса ӗнес килет.