“Альтернатива” җәмгыятен Русия Федерация Советы хөрмәтләде

Пластмассадан халык куллануы әйберләре һәм көнкүреш кирәк-яраклары җитештерүгә махсуслашкан “Альтернатива” җәмгыяте балалар өчен товарлар чыгаруда да шактый бай тәҗрибә туплап, киң танылу алды. Атап әйткәндә, “Уолт Дисней” кебек дөньякүләм билгеле компанияләр белән эшлекле бәйләнешләр урнаштыру нәтиҗәсендә, киң танылган бренд “Альтернатива”ның тамгасына әверелде. Предприятиенең балалар номенклатурасы товарлары Русиянең барча төбәкләрендә һәм БДБ илләрендә югары сыйфаты өчен аеруча киң сорау белән файдалана. Моны күздә тотканда, ниһаять, “Альтернатива” продукциясе Русия Федерциясе Советы дәрәҗәсенә дә чыкты, дип ышанычлы әйтергә мөмкин. Мәскәүдә үткән “Алтын аю баласы” Балалар өчен товарлар һәм хезмәтләр күрсәтү өлкәсендә Милли премияләр тапшыру тантанасында “Альтернатива”вәкилләре дә катнашты. Предприятиедә җитештерелгән балалар утыргычы “Иң яхшы мебель” номинациясендә өченче урынны алды. Югары дәрәҗәле бәйгедә җиңүчеләргә бүләкләрне Русиянең Федераль җыелышы рәисе Валентина Матвиенко, Балалар товарлары индустриясе предприятиеләре Ассоциациясе җитәкчесе Антонина Цицулина, Русия Президентының Балалар хокуклары буенча Вәкаләтле вәкиле Мария Львова-Белова кебек күренекле шәхесләр тапшырды. Атап әйткәндә, Валентина Ивановна тәбрикләү чыгышында, илгә балалар өчен югары сыйфатлы көнкүреш товарлары белән бергә, зур зәвыклы итеп башкарылган уенчыклар да таләп ителүен билгеләде. Әйткәндәй, “Альтернатива”да бу юнәлештә тәүге адымнар ясалып, берничә цехта балалар уенчыклары җитештерү җайга салынып килә. Балалар товарлары өлкәсендәге Милли премия ил күләмендә иң абруйлы һөнәри бәйгеләрнең берсе дәрәҗәсендә тора. Быел анда балалар товарлары җитештерүче һәм бу өлкәдә хезмәтләр күрсәтүчеләрдән Русиянең 28 төбәге предприятиесе катнашты. Бәйгенең финал өлешенә исә конкурсның 15 номинациясендә 100дән артык компания чыкты, алар 200дән артык исемдәге продукция һәм хезмәтләр тәкъдим итте. Әйткәндәй, алар арасында Башкортстанның да дүрт предприятиесе бар иде. - Ил дәрәҗәсендәге бәйгедә җиңеп, премия яулау безнең коллектив өчен гаять куанычлы вакыйга, зур казаныш,- дип шатлыгын уртаклашты “Альтернатива” җәмгыятенең җитәкчесе Раил Фәхретдинов.- Шунысы аеруча мөһим – бәһаны компетентлы жюри куйды, димәк товарның сыйфаты яхшы, моңа өстәп, ул кулланганда хәвефсез дә. Моңардан янә бер нәтиҗә - “Альтернатива” Русиядә балалар өчен товар җитештерүчеләрнең алдынгы сафында кала. Милли премия пластмасса заводының ил күләмендә абруен күтәрә, ә бу инде “Альтернатива” товарларының сатылуында да уңай чагылыш таба, безнең брендның дәрәҗәсен күтәрә. Июнь башында Башкортстан Республикасы Хөкүмәтенә “Алтын аю баласы” Милли премиясе “Индустрия даны залы” номинциясе буенча да тапшырылды. Билгеле булуынча, үткән елның октябрендә безнең төбәк җитәкчелеге Балалар товарлары индустриясе предприятиеләре Ассоциациясе (АИДТ) белән берлектә эшчәнлек турында килешү төзеп, республикада балалар товарлары индустриясен үстерү программасын кабул итте. 2020-2024 елларга исәпләнгән үзара хезмәттәшлек турындагы килешү бу юнәлештәге чаралар планына ярашлы кабул ителде һәм ул Русия Хөкүмәте тарафыннан расланды. Республиканың сәнәгать, энергетика һәм инновацияләр министры Александр Шельдяев билгеләвенчә, Башкортстанда балалар өчен сыйфатлы һәм хәвефсез товарлар җитештерү ныклы күзәтүгә алынды. Нәтиҗәдә, 2022 елның декабреннән балалар товарлары кластеры предприятиеләре саны 15тән 84кә күтәрелде. Әйтергә кирәк, соңгы чорда республика сәнәгатендә эшчәнлекне дәртләндерү берничә юнәлештә төсмерләнә. Болар - сәнәгатьне үстерү Фонды буенча ташламалы займнар бирү, товарларны эчке һәм тышкы базарларга чыгару, сертификатлар алу өчен субсидияләр бүлү. Предприятиеләр чыгымнарының 50 процентын субсидияләү дә каралган. "Альтернатива” җитәкчелеге тудырылган мөмкинлекләрне уңышлы файдалану максатында, балалар товарлары җитештерүне арттыруны өстенлекле юнәлеш итеп алды. Фото: “Альтернатива” сайты.