Туган тел укытучылары премия алачак

Агымдагы елдан башлап Башкортстанда туган телләр укытучылары һәм полилингваль мәктәпләр педагоглары акчалата бүләк алачак. Башкортстан Хөкүмәтендә Премьер-министр Андрей Назаров рәислегендә башкорт һәм урыс телләренең иң яхшы укытучыларын һәм преподавательләрен матди яктан дәртләндерү мәсьәләсен карадылар. — Бүген республиканың мәгариф системасында 5 924 туган тел укытучысы эшли. Мәктәпләрдә 10 туган тел өйрәнелә. Шунысын да билгеләп үтәргә кирәк, узган ел төп халыкларның Халыкара телләре унъеллыгы башланды, шуңа күрә туган телләргә ярдәм итү чараларына аерым игътибар бирергә кирәк. Бу санлаштыру, туган телләрнең торышын мониторинглау, шулай ук профильле педагогик кадрлар әзерләү мәсьәләләренә кагыла, – диде Андрей Назаров. Ел саен 50 иң яхшы башкорт һәм урыс телләре укытучыларына 50 мең сум күләмендә акчалата бүләкләр бирелә. Акчалата бүләкләү педагогларга нәтиҗәле һөнәри эшчәнлеге һәм республика мәгарифен үстерүгә керткән зур өлеше өчен бирелә һәм ул Башкортстан Республикасының дәүләт телләренә дәүләт ярдәме чарасы булып тора. Акчалата бүләк алуга өч елдан да ким булмаган эш стажы булган укытучылар дәгъва итә ала, аларның төп эш урыны республиканың мәгариф оешмаларында булырга тиеш. Республика бюджетыннан “Башкортстан Республикасында мәгарифне үстерү” дәүләт программасы кысаларында 2,5 миллион сум күләмендә финанс чаралар бүлеп бирелә. Узган елның сентябрендә узган Туган тел һәм әдәбият укытучыларының төбәкара форумы нәтиҗәләре буенча республика Башлыгы Радий Хәбиров туган тел укытучыларын Хөкүмәтнең акчалата бүләкләү конкурсында катнашу мөмкинлеген карарга кушты. Мәгариф һәм фән министрлыгы тарафыннан Башкортстан Республикасы Хөкүмәте карары проекты эшләнгән. Нәтиҗәдә, әлеге карар белән мәктәп һәм колледжларның 30 башкорт теле укытучыларын һәм преподавательләрен, мәктәп һәм колледжларның 30 урыс теле укытучыларын һәм преподавательләрен, мәктәп һәм колледжның 20 туган тел укытучыларын һәм преподавательләрен, Башкортстан Республикасының күппрофильле полилингваль мәктәпләренең 20 укытучысын акчалата бүләкләү планлаштырыла: Әлеге карар проектын гамәлгә ашыруга Мәгариф һәм фән министрлыгына каралган акчалар кысаларында 2,5 миллион сум күләмендә өстәмә финанс чаралары бүлеп биреләчәк. 2023 ел Русия Президенты В. Путин тарафыннан “Педагог һәм остаз елы” дип игълан ителде. Моннан тыш, республикада кабул ителгән Башкортстан Республикасы дәүләт телләрен һәм Башкортстан Республикасы халыкларының туган телләрен укыту концепциясе, республиканың полилингваль күппрофильле мәктәпләрен үстерү концепциясе республиканың дәүләт һәм туган телләрен саклауга һәм үстерүгә дәүләт ярдәме чараларын күздә тота.