Башҡортостандың иң һылыу ауыл ҡыҙы Ҡыйғы районында йәшәй. “Селяночка” республика конкурсында гран-прины тап ошо район гүзәле яулаған. Проект Дыуан, Мәсетле, Ҡыйғы, Салауат һәм Өфө райондарының 20 йәштән 35 йәшкә тиклемге 12 һылыуын берләштергән. Уларҙың араһында төрлө һөнәр кешеләре – мәҙәниәт һәм медицина хеҙмәткәрҙәре, тәрбиәселәр, педагогтар бар. Ҡыйғы районының Ибрай ауылы китапханаһында китапханасы булып эшләгән Лилиә Мөхәмәтйәнова еңеүсе булды, төп бүләк – гран-при уға тапшырылды, тип яҙа “Беҙҙең Ҡыйғы “гәзите. Төрлө номинацияларҙа еңеүселәр билдәләнде. Сарала ҡатнашыусыларҙы мәҙәниәт министрының беренсе урынбаҫары Наталья Лапшина, Ҡыйғы районы хакимиәте башлығы Зөһрә Гордиенко сәләмләне. - Өсөнсө тапҡыр уҙғарылған “Селяночка” конкурсы һабантуйға йәм өҫтәне, беҙ быйыл республика дәрәжәһенә сыҡтыҡ. Конкурсты ни өсөн үткәрәбеҙ? Беренсенән, ауылда матур, тырыш ҡыҙҙар йәшәгәнен күрһәтергә теләйбеҙ, улар эшкә лә өлгөр, йорт хужалығын да алып баралар. Бөгөн мин быға тағы бер ҡат инандым. Конкурста ҡатнашыусылар барыһы ла ауыл ҡыҙҙары, – тип белдерҙе Зөһрә Гордиенко. Конкурста ҡатнашыусылар милли аш-һыу әҙерләүҙә, уҡ атыуҙа көс һынашты, милли кейемдәрҙең бер элементын биҙәү буйынса оҫталыҡтарын күрһәтте, ауылдарының тарихы менән таныштырҙы, ижади номерҙар менән сығыш яһаны. Сөмбөл Исмәғилева фотолары.