Башҡортостан Башлығы Радий Хәбиров XXVI Петербург халыҡ-ара иҡтисади форумы майҙансығында ТАСС мәғлүмәт агентлығына интервью бирҙе. Төбәк етәксеһе иҡтисади сәйәсәттең яңы инструменттары һәм төрлө тармаҡтарҙа алдынғы республика брендтарына ярҙам итеү тураһында һөйләне. – Форумда Башҡортостан делегацияһының эшен нисек баһалайһығыҙ? Был саранан ниндәй һөҙөмтәләр көтәһегеҙ? – Бик күп эшлекле осрашыуҙар үткәрҙек. Был майҙанда беҙҙең бөтә партнёрҙар ҙа тиерлек – министрлыҡтар һәм ведомстволар, үҫеш институттары, ҙур компаниялар етәкселәре йыйылды. Ғәҙәттәгесә, бик күп килешеүҙәр төҙөйбөҙ. Ҡағиҙә булараҡ, һүҙ унлаған миллиард һум тураһында бара. - Хоккей тураһында һорау. “Салауат Юлаев” клубы хоккейсыларының эш хаҡы тураһында билдәлеме? Һеҙ уны контролдә тотаһығыҙмы? Ул нисек хәл ителергә тейеш? – “Салауат Юлаев”та хеҙмәт хаҡы менән барыһы ла хәл ителде. Финанслауҙы тәьмин иткән билдәле партнерыбыҙ бар. Ҡайһы берҙә килеп тыуған бюрократик һорауҙар ҙа булды. Улар контролгә һәм аудитҡа ҡағыла, барыһы ла әле хәл ителгән. Әле беҙҙең команда ял итә, әммә тиҙҙән күнекмәләр башлай. Киләһе миҙгелде улар уңышлы итеп үткәрер, тип уйлайым. – “Өфө” футбол клубы менән хәл нисек? Ул дәүләт финанслауын һаҡлаймы? – Һис шикһеҙ. Беҙҙең сығымдар статьяһында дәүләт финанслауы ла бар. Клубҡа Беренсе лигаға сығыу бурысын ҡуйҙыҡ. – “Башҡортостан сода компанияһы” тураһында. Ҡасан һәм кем “Башҡортостан сода компания”һы өсөн сеймал сығанағы тураһында ҡарар ҡабул итергә тейеш? – Ҡарарҙы компания етәкселеге менән бергә ҡабул итербеҙ. Бөгөн Шахтау карьерының геологик үҙенсәлектәрен өйрәнеү бара. Альтернатив варианттар ҙа бар – оҙайлы ваҡытҡа ярайһы уҡ ҙур ятҡылыҡтар. – Әгәр ҙә альтернатив сеймал сығанаҡтары тураһында һүҙ йөрөтһәк, уларҙың ҡайһыныһы, һеҙҙеңсә, иң перспективалыһы? – Хәҙер беҙгә ғәмәлдәге карьерҙа компанияның ниндәй ваҡытҡа сеймалы етәсәген аңлау мөһим. Шул уҡ ваҡытта икенсе сеймал сығанаҡтарын өйрәнә башлайбыҙ, производствола ҡулланыуҙың яраҡлылығын аңлау өсөн анализдарға пробалар алабыҙ. Шуны билдәләп үткем килә: был маҡсаттарға шихандарҙы эшкәртеү, һис шикһеҙ, булмаясаҡ. Фото: traveltimes.ru