8 -11-се класс уҡыусыларын йәйге осорҙа программалауға уҡытыу өсөн республиканың ҡала һәм райондарында 50-нән ашыу майҙансыҡ “Һанлы иҡтисад” милли проектының “Киләсәк коды” программаһы буйынса ойошторолған, тип хәбәр иттеләр төбәк дәүләт идаралығының Һанлы үҫеш министрлығында. Белем биреү лагерына яҙылыу ағымдағы йылдың 31 майына тиклем “Дәүләт хеҙмәттәре” порталында асылды. Лендингта төбәкте һайларға кәрәк, картала курстарҙың исемдәре яҙылған бөтә офлайн-майҙансыҡтар күренә, уларҙың береһенә ғариза бирергә мөмкин. Бушлай курстарҙа Python, шулай уҡ PHP һәм JavaScript-да ҡушымталар, сайттар һәм уйындар эшләргә тәҡдим ителә. Имтихандарҙы уңышлы тапшырып, уҡыусылар курсты тамамлау тураһында сертификат аласаҡ. Әйтеп үтергә кәрәк, былтырҙан башлап “Киләсәк коды” программаһында 330-ҙан ашыу ҡатнашыусы информатика, милли технологик олимпиада, “Ҙур саҡырыуҙар” бөтә Рәсәй ғилми-технологик проекттар конкурсы, милли олимпиада еңеүселәре һәм призерҙары булды. “Һанлы иҡтисад” милли проекты иҡтисадта һәм социаль өлкәлә һанлы технологияларҙы йылдамыраҡ индереүгә, юғары технологиялы бизнес өсөн шарттар булдырыуға, глобаль баҙарҙа илдең конкуренцияға һәләтлелеген арттырыуға, милли именлекте нығытыуға һәм кешеләрҙең йәшәү сифатын арттырыуға йүнәлтелгән. Рәсәй Федерацияһы Президенты Владимир Путин тәҡдим иткән милли проекттар 2019 йылда старт алды. Фото: национальныепроекты.рф