Ни өсөн инвесторҙар беҙгә киләсәк?

Башҡортостан Башлығы Радий Хәбиров XXVI Петербург халыҡ-ара иҡтисади форумы майҙансығында ТАСС мәғлүмәт агентлығына интервью бирҙе. Төбәк етәксеһе иҡтисади сәйәсәттең яңы инструменттары һәм төрлө тармаҡтарҙа алдынғы республика брендтарына ярҙам итеү тураһында һөйләне. – Радий Фәрит улы, былтыр республика иҡтисадына инвестициялар күләме ярайһы уҡ артты һәм 500 миллиард һумдан артты. Хәҙерге шарттарҙа ла бындай динамика һаҡланырмы һәм уға ниндәй саралар күрә алыр инегеҙ? – Эйе, 2022 йыл йомғаҡтары буйынса инвестициялар күләме 512 миллиард һумға етте. Был, ысынлап та, яҡшы күрһәткес, яҡшы динамика. Санкцион баҫым был һанға йоғонто яһаманы, сөнки билдәле бер инертлыҡ бар - күп кенә проекттарға нигеҙҙе иртәрәк һалғайныҡ. Санкцияларҙың 2023-2024 йылдарҙа ла ҙур йоғонто яһай алыуын аңлайбыҙ. Шуға күрә инвестицияларҙың тотороҡло үҫешен һаҡлап ҡалыу өсөн иҡтисадҡа средстволар йәлеп итергә кәрәк. Бының өсөн беҙ нимә эшләнек? Хәлде баһалап, инвесторҙарға башҡа төбәктәр тәҡдим итмәгән яңы шарттар бирергә кәрәклеген аңланыҡ. Һөҙөмтәлә республиканың Инвестицияларҙы яҡлау һәм дәртләндереү программаһы ҡабул ителде. Яңы ҡараштың асылы шунда: өҫтөнлөклө инвестиция проекты статусын алыу өсөн бөтә талаптарҙы либералләштерҙек. Элек бындай статусҡа документтар пакеты бик ҙур булһа, хәҙер беҙ бюрократияны мөмкин тиклем кәметтек. Бөгөн беҙ, асылда, инвестициялар күләмен, предприятиеның исемен тасуирлаған өс документ талап итәбеҙ. Был - беренсеһе. Икенсеһе. Ни өсөн өҫтөнлөклө инвестиция проекты статусы кәрәк? Сөнки был сауҙалашыуһыҙ ерҙе ҡуртымға алыу өсөн кәрәкле шарт. Бында бөтә процестарҙы лә ярайһы уҡ ҡулайлаштырҙыҡ. Бынан алда бизнес йыш ҡына оҙайлы регламент сроктары менән осраша ине. Йә ер бүленмәгән, йә участкаға сикләү һалынған. Шуға күрә инвестиция проекты өсөн ерҙе бер йылдан ашыу бүлеү осраҡтары булды. Хәҙер беҙ инвесторҙар участкаларҙы 60 көндән дә һуңға ҡалмайынса ҡуртымға аласаҡ, тип һөйләштек. Яңы программа 2023 йылдың 1 июленән эшләй башлай. Ул төрлө сәбәптәр арҡаһында әлегә шикләнгән инвесторҙарға ыңғай ҡарар ҡабул итергә булышлыҡ итәсәк. Улар өсөн барыһы ла ябайлаштырылды. Өҫтәүенә, беҙ матди ярҙамдың бөтә сараларын – субсидияларҙы һәм һалым льготаларын һаҡлайбыҙ. Минеңсә, ағымдағы хәлдә был адекват аҙымдар, улар ярҙамында инвестициялар динамикаһына булышлыҡ итә аласаҡбыҙ, тип ышанам. Ошо йәһәттән план күрһәткестәрен яңынан ҡарарға йыйынмайбыҙ. Фото: Башҡортостан Башлығы сайты.