Йәй – күптәр өсөн иң йәмле, иң яратҡан миҙгел. Әммә уның да мәшәҡәт тыуҙырыр сәбәптәре етерлек. Шуларҙың береһе – әрһеҙ ҡан һурғыс бөжәк – серәкәй. Хәҙер сауҙа нөктәләрендә серәкәйгә ҡаршы һәр төрлө кремдар, аэрозолдәр етерлек. Әммә уларҙы тәнгә йыш һөртөү кире эҙемтә биреүе, аллергия тыуҙырыуы ихтимал. Был осраҡта халыҡ араһында таралған ябай кәңәштәргә лә ҡолаҡ һалырға кәрәктер. Серәкәй тешләгән урынға тәнде бешермәҫлек эҫелектәге ҡалаҡ баҫығыҙ. Йылы реакция тыуҙырған аҡһымды таратып, ҡысыуҙы туҡтатасаҡ. Тағы бер сара: уртаға йәки бер нисә киҫәккә ҡырҡылған лимонға ҡәнәфер (гвоздика) ҡаҙап сығығыҙ. Тәҙрә, карауат янына ҡуйһағыҙ, йоҡоғоҙ тыныс булыр, серәкәйҙәр йонсотмаҫ. Лимон менән ҡәнәфер еҫен серәкәй яратмаһа ла, кеше өсөн уның бер зыяны ла юҡ. Әгәр инде серәкәй тешләп, тән ҡыҙарһа йәки шешһә, иң һөҙөмтәле алымдарҙың береһе – шул урынды һаҡ ҡына итеп лимон киҫәге менән ышҡыу. Һеңлемдең ҡыҙының тәне серәкәй тешләһә, шунда уҡ ҡыҙарып сыға. Интернеттағы ябай ғына кәңәш ныҡ һөҙөмтәле булып сыҡты. Ысынлап та, ярҙам итә! Фото: ecoportal.su