“Тушенка яһау яҡшы традицияға әүерелде, – тип яҙҙы үҙенең сәхифәһендә Стәрлебаш районы ирекмәндәренең береһе Илнара Ҡыуатова. Ҡорбан байрамы алдынан махсус хәрби операциялағы хәрбиҙәргә тушенка әҙерләү өсөн банка йыйыу тураһында иғлан итәләр. Һауыт ирҙәре яу ҡырында булғандарҙың ҡатындары һәм райондың битараф булмаған халҡы ярҙамында тиҙ йыйылған. Бөгөнгө көнгә тиклем банкалар, борсаҡ, тоҙ, уксус, сода һәм башҡа кәрәкле әйберҙәр алып барылған. Шулай уҡ урындағы эшҡыуар Рәшит Миңлефәтих улы Хәтмуллин да ситтә ҡалмаған, ҡапҡастар һәм төрөү өсөн ҡумталар биргән. Был юлы Стәрлебаш ирекмәндәре тарафынан 123 банка һыйыр һәм 28 банка һарыҡ итенән тушенка етештерелгән. Ит менән Тәтер-Арыҫлан ауылынан Тәлғәт Тимербулат улы Шәрипов һәм Альберт Мәүлийәр улы Атласов тәьмин иткән. Ҡорбан байрамы хөрмәтенә үгеҙ һәм һарыҡ һуйғандар. Шулай уҡ Эльмира һәм Рәсүл Мирхәйҙәровтар, Стәрлебаш ауылының 2-се һанлы урта мәктәбе һәм Ямғырсы мәктәбе уҡытыусылары коллективы әҙерләүҙә һәм төрөүҙә ярҙам итә. Айҙарәле ауылынан Илшат Ҡасим улы Ғәләүетдинов, Радмир Рәйес улы Хәмитов, Рөстәм Миңләхәт улы Сәйфетдинов һәм Руслан Барый улы Мөхәмәтов финанс яҡтан әүҙем ярҙам итә, етештереүҙә һәм ташыуҙа ҡатнаша. Этикеткаларҙы Стәрлебаш районының бизнес-шәрифе Айнур Наил улы Юнысов әҙерләгән. Сығанаҡ: vk.com/ilbuton