Баҡса еләгенә һәр саҡ һорау бар

Шаран районының Нөрәй ауылы биләмәһендә алты шәхси хужалыҡ еләк үҫтереү менән шөғөлләнә. Юрий Байбулатовтың Йәнәхмәттәге хужалығы - иң ҙурҙарҙың береһе. Йәммәттә йәшәгән Валентин Минькаев та баҡсасылыҡта ырамлы аҙымдар яһай, тип яҙа “Шаранские просторы” гәзите. Юрий Булатович 2003 йылда Мәскәүгә эшкә китә, тик күп тә үтмәй тыуған яғына әйләнеп ҡайта һәм үҙ эшен асып, икмәк бешереүгә тотона. Аҙаҡ ер биләмәһен ҡуртымға алып, 70 сутый ерҙә баҡса еләге үҫтерә башлай, ҡалған ике гектар ергә лә еләк ултырта. Ике-өс йылдан һуң тәүге тапҡыр бер тонна еләк йыйып ала. Тәүҙә “Фестивальная”, “Зенга-Зенгана”, “Лорд” сорттарына өҫтөнлөк бирһә, аҙаҡ “Азия” сортын һынап ҡарай. Яҡындары - һәр ваҡыт уның өсөн ныҡлы терәк. Еләк йыйыу осоронда ҡатыны Анна, улы Алексей, килене Инна, ейәндәре ярҙамға килә. Алексей мәктәптә физкультура уҡытыусыһы булып эшләй, әлегә баҡсасы булырға йыйынмай, әммә һәр саҡ атаһына ярҙам итергә әҙер. Ейәндәре олатаһының юлынан китерме - быныһын ваҡыт күрһәтер, улар бөгөн – эшҡыуарҙың “уң ҡулы”. Юрий Байбулатовтың әйтеүенсә, баҡса еләге үҫтереү - перспективалы хеҙмәт, уға һәр саҡ һорау бар. Уны һатыуы ла еңел, сөнки күрше райондарҙан һәм Татарстандан күмәртәләп һатып алыусылар бар. “Автофургон менән үҙем дә һатырға сығам. Көҙ еткәс, тағы 50 сутый ерҙә “Азия” сортын ултыртырға уйлайым”,– ти баҡсасы. Валентин Минькаев баҡсасы булып киткәнсегә ҡәҙәр Туймазыла йорттар төҙөү менән шөғөлләнә. Тыуған ер уны ла үҙенә тарта, ауылға ҡайтыу менән еләк үҫтереүгә тотона. Өлгө алырлыҡ кешеләр бар – ата-әсәһе оҙаҡ йылдар баҡсасылыҡ менән шөғөлләнгән.Тәүҙә ике сутый ерҙә “Азия” һәм “Мурано” сорттарын ултырта, был участканан киләһе йылына уҡ уңыш алыуға өлгәшә. Быйыл баҡсасы еләк плантацияһын 70 сутыйға тиклем арттырған, тиҙ өлгөрөүсе һәм юғары уңыш биреүсе “Ания”, “Вивара” сорттарын ултыртҡан. Валентин Минькаевҡа ғаиләһе – ҡатыны Мария, ҡыҙы Кира һәм улдары Алан менән Илья ярҙамлаша. Баҡсасылар ауыл Советының көндәлек тормошонда ла әүҙем ҡатнаша. Валентин Аҫылйән улы ауыл советы депутаты булараҡ халыҡ менән аралашып, төрлө мәсьәләләрҙе хәл итә. Юрий Булат улы 2020 йылда Бөйөк Ватан һуғышында ҡатнашыусы яугирҙәргә тыуған ауылында һәйкәл ҡуйған. Икеһе лә бөгөн махсус хәрби операцияла ҡатнашҡан егеттәргә гуманитар ярҙам күрһәтеүҙә үҙ өлөштәрен индерә. Фото: “Шаранские просторы”.