Рәсәй һәм Беларусь төбәктәренең X форумы сиктәрендә, Башҡортостандың Премьер-министры Андрей Назаров һәм Рәсәйҙең Фән һәм юғары белем биреү министры Валерий Фальков донъя кимәлендәге Евразия фәнни-белем биреү үҙәгенең вуз-ара студенттар кампусының тәүге сираты майҙансығында булды. IQ-парктың реконструкцияланған бинаһының майҙаны 35 мең квадрат метрға тиң һәм ул ике өлөштән тора. Бинаның төп өлөшө ете ҡатлы комплексты биләй, унда төҙөлөш эштәренән һуң вуздарҙың тикшеренеү-уҡыу майҙансыҡтары урын аласаҡ, шулай уҡ эшлекле зоналар, стартап-үҙәктәр һәм йәмәғәт киңлектәре була. Бинаның иң бейек өлөшө 15 ҡатлы. Унда IQ –китапхана, университет офистары, IT технопарк, күргәҙмә һәм эшлекле зоналар биләйәсәк. Өфөләге вуз-ара кампустың барлыҡ объекттарының дөйөм майҙаны 147 мең квадрат метрҙан артып китә. Шул иҫәптән торлаҡ корпустар 78 мең квадрат метр майҙанды биләйәсәк, уларҙа 2025 йылдан 3,5 мең студент йәшәй аласаҡ. Кампус Өфөнөң Фән һәм технологиялар университетынан алыҫ түгел, ҡала үҙәгендә урынлаша. Кампуста студенттар, уҡытыусылар, йәш ғалимдар бер юлы уҡый һәм эшләй аласаҡ. Кампустың икенсе сираты ете торлаҡ корпус төҙөүҙе үҙ эсенә индерә. Шулай уҡ 48 уҡыу аудиториялары, лабораториялар, спорт объекттары бар. Кампустың үҙәген төҙөү ҙә икенсе сират сиктәрендә башҡарылаһы эш. Унда аудиториялар, тәжрибә-тикшеренеүҙәре блогы, персональ медицина клиникаһы төҙөләсәк. Кампустың икенсе сираты буйынса проектлауға әҙерлек дауам итә, киләһе йыл башына төҙөлөштө башлау күҙаллана. Өфөлә вуз-ара кампус булдырыу Башҡортостанда юғары белем биреүҙең баһаһын күтәреүгә, илебеҙҙең башҡа төбәктәренән, сит илдәрҙән студенттар һанын арттырыуға булышлыҡ итәсәк. Билдәле булыуынса, Рәсәй Президенты Владимир Путин 2030 йылға 25 заманса кампустар селтәрен булдырырға ҡушты, уларҙың 17-һе тормошҡа ашырыла башлаған. Был саралар “Фән һәм университеттар” милли проекты сиктәрендә башҡарыла. Фото: Башҡортостан Хөкүмәте сайты.