28 июндә Өфөлә Рәсәй һәм Беларусь төбәктәренең Х Форумы сиктәрендә Беларусь Республикаһы һәм Башҡортостан Республикаһы ҡулланыусылар йәмғиәттәре союзы араһында килешеүгә ҡул ҡуйылды. – Әлеге ваҡытта Башпотребсоюздың ҡеүәтле етештереү базаһы бар, үҙебеҙҙә етештерелгән тауарҙарҙы әҙерләү һәм һатыу менән әүҙем шөғөлләнә. Башҡортостанда кооперацияны үҫтереүҙең төп бурысы ауыл хужалығы, емеш-еләк продукцияһын эшкәртеүҙе сифатлы яңы кимәлгә күтәреү һәм Башҡортостан Республикаһы эсендә лә, унан ситтә лә тауар әйләнешендә лайыҡлы урын биләү. Беларусь коллегаларының был йүнәлештә яҡшы тәжрибәһе бар. Ике союздың кооперацияһы ике яҡ өсөн дә файҙалы булыр тип ышанам, – тип билдәләне сауҙа һәм хеҙмәтләндереү министры Алексей Гусев. Килешеүҙең нигеҙе булып перспективалы берлектәге проекттарҙы тормошҡа ашырыуға булышлыҡ итеү, ҡулланыусылар кооперацияһы ойошмаларының иҡтисади ҡеүәтен нығытыу маҡсатында яҡтар араһында үҙ-ара эш итеү һәм стратегик хеҙмәттәшлекте нығытыу тора. Был килешеү халыҡтың йәшәү кимәлен һәм именлеген күтәреү, уның тауарҙарға һәм хеҙмәттәргә ихтыяжын ҡәнәғәтләндереү, ауыл хужалығы продукцияһын әҙерләү һәм эшкәртеү системаһын камиллаштырыу маҡсатында яҡтарҙың ҡулланыусылар кооперацияһы потенциалын үҫтереүгә һәм файҙаланыуға йүнәлтелгән. Был килешеүгә ярашлы, яҡтар үҙ-ара файҙалы сауҙа-иҡтисади мөнәсәбәттәрҙе киңәйтеүгә булышлыҡ итәсәк. Хәтерегеҙгә төшөрәбеҙ, ошо көндәрҙә республикала Рәсәй һәм Беларусь төбәктәренең X Юбилей форумы үтте. Был форумдың маҡсаттары булып Беларусь Республикаһы һәм Рәсәй Федерацияһының парламент-ара, сауҙа-иҡтисади, фәнни-мәғариф, мәҙәни бәйләнештәрен нығытыу, эшлекле бәйләнештәрҙе киңәйтеү, ике яҡлы хеҙмәттәшлектең перспективалы йүнәлештәрен үҫтереү тора. Беларусь Республикаһы менән хеҙмәттәшлек Рәсәй Президенты Владимир Путиндың май указдарына ярашлы ҡабул ителгән “Халыҡ-ара кооперация һәм экспорт” милли проектын (национальный проект “Международная кооперация и экспорт”) ғәмәлгә ашырыуға булышлыҡ итә. Фото һәм мәғлүмәт сығанағы: Башҡортостандың Сауҙа һәм хеҙмәтләндереү министрлығының матбуғат хеҙмәте