Республика Башлыгы Радий Хәбиров үзенең чыгышында юл буе сервисының төбәк үсешенең перспектив һәм инвестицион җәлеп итүчән юнәлешләренең берсе булуын ассызыклап үтте. Башкортстанда юл буе сервисын үстерү концепциясе 2024 елга кадәр гамәлдә. Аның төп юнәлешләре - тармак инвесторларына ярдәм итү. Русия Хөкүмәте Рәисе урынбасары Дмитрий Чернышенко концепцияне булдыру кысаларында нәтиҗәле идарә итү моделен формалаштырырга һәм аны бөтен илгә масштаблаштырырга кирәклеген белдерде. Мисал итеп вице-премьер Башкортстанның уңай тәҗрибәсен китерде. - Башкортстанда автомобиль юллары челтәре зур үсеш алган, шуңа күрә юл буе сервисы системасы безнең өчен зур әһәмияткә ия. Бу юнәлешкә ярдәм итү һәм аны үстерү программасы аерым тәртиптә сатулашуларсыз җир кишәрлекләре бүлеп бирүне күздә тота. Инвесторларны җәлеп итә торган икенче нәрсә - инженер һәм транспорт инфраструктурасын булдыруга чыгымнарны 30 миллион сумга кадәр каплау. Бу бизнес өчен әһәмиятле ярдәм, чөнки юл буе сервисы объектларының уртача бәясе 100дән 200 миллион сумга кадәр тирбәлә. Бездә инвестицияләрнең гомум күләме 13 миллиард сум чамасы булган инвестпроектларның шактый зур пулы бар инде, - дип билгеләде Радий Хәбиров. Юл буе сервисы инфраструктурасын үстерү төбәккә туристлар агымы үсешенең бер факторына әверелде. Бу елның беренче кварталы нәтиҗәләре буенча ул 412 мең баруга җитте (Идел буе федераль округында - 3нче урын, Русиядә - 12нче урын), бу узган елның шул ук чоры дәрәҗәсеннән 29 процентка югары. Сессиядә катнашучылар Башкортстанның автотуризмны үстерү мәсьәләсендә комплекслы якын килүен билгеләп үтте һәм илнең башка төбәкләрендә республика тәҗрибәсен таратырга тәкъдим итте. Фото: glavarb.ru