Балаларға һәм үҫмерҙәргә ҡыҙыҡ буласаҡ

16 июндә Петербург халыҡ-ара иҡтисади форумы барышында Башҡортостан Башлығы Радий Хәбиров “Киберфизик киңлек: Рәсәйҙә эшләнгән” сессияһында сығыш яһаны. Дискуссия модераторы, “Юғары иҡтисад мәктәбе” милли тикшеренеү университеты проректоры Дмитрий Земцов Башҡортостан Милли киберфизик платформаны индергән пилот төбәк булып сығыш яһай тип билдәләне һәм Радий Хәбировҡа проектҡа ярҙам иткәне өсөн рәхмәт белдерҙе. – Милли киберфизика платформаһы йыйылған ҡарарҙарҙы берләштерәсәк һәм Рәсәй уҡыусыларының технологик белем алыуға күпләп инеүенә нөктә буласаҡ, уларҙы түңәрәктәргә, инженер ярыштарына һәм артабан вуздарҙа профилле әҙерлек йүнәлештәренә йәлеп итергә ярҙам итәсәк, - тип билдәләне Дмитрий Земцов. - Башҡортостан Башлығы командаһы беҙҙең проектты әүҙем хупланы, үҙе ҡыҙыҡлы, уникаль ҡарарҙар тәҡдим итә. Радий Хәбиров үҙ сығышында Стратегик башланғыстар агентлығы, Башҡортостан Хөкүмәте һәм Милли технологик башланғыстың түңәрәктәр хәрәкәте менән берлектә донъяла тәүге киберфизик платформа булдырған Рәсәй эшкәртеүселәре коллективына рәхмәт әйтте. Ул “фиджитал” элементтары менән популяр жанрҙарҙа стратегик мобиль видеоуйындар серияһын үҙ эсенә ала. “Берлога” проекты платформаның тәүге элементтарының береһе булды. - Ошонда ултырған йәштәребеҙгә лә рәхмәт әйткем килә. Улар иң талантлы, аҡыллы һәм сағыу. “Берлога” милли киберфизика платформаһының амбассадоры – Стәрлетамаҡтың 3-сө башҡорт лицей-интернатының 10А класс уҡыусыһы Глеб Чекмарёв, бик талантлы егет. Әлбиттә, беҙ Милли технологик башланғыстарҙың түңәрәктәр хәрәкәте менән бергә эшләнек. Белеүегеҙсә, илебеҙҙә ҡайһы бер әйберҙәр идея йәһәтенән илһамландырыусы булған саҡта эшләй башлай. Киберфизика платформаһын булдырыуҙа ул “Роснефть” компанияһының вице-президенты Геннадий Иванович Букаев булды, - тип билдәләне Радий Хәбиров. - Платформа балаларыбыҙҙы технологик, һанлы киңлеккә индерәсәк. Төбәк етәксеһе “Берлога”ла уҡыусылар уйнаған персонаждарҙың программист, инженер, биотехнолог рәүешендә технологик яҡтан алға киткән йомшаҡ айыуҙар булыуын өҫтәне. Улар төрлө хәлдәрҙә ярҙам һорап кешеләргә мөрәжәғәт итә. - Быларҙың барыһы ла матур һәм күңелле. Минеңсә, был уйынға бик күп балаларҙы йәлеп итеп буласаҡ. Шуныһы мөһим: был үҙ-үҙен яңыртып етештереүсе, артабан үҫешеүсе платформа. Бында балалар ижади уйлап тапҡан ҡыҙыҡлы яҡтар бик күп. Ошо платформа аша Башҡортостан – ул нефть һәм бал тураһында ғына тигән стереотипты һындырабыҙ. Юҡ, беҙ талантлы балалар, алдынғы технологиялар тураһында ла, – тип һыҙыҡ өҫтөнә алды Радий Хәбиров. - Ошо проектҡа башҡа субъекттарҙа, һанлы үҫеш институттарында ла ярҙам алыуыбыҙ мөһим. Ошо проектҡа башҡа субъекттарҙа, һанлы үҫеш институттарында ла ярҙам алыуыбыҙ мөһим. Шунһыҙ бер ни ҙә килеп сыҡмаясаҡ. Продукт бар, уны таратырға, тәнҡит күҙлегенән аңларға һәм был процесҡа иң һәләтле йәштәрҙе йәлеп итергә кәрәк. “Берлога”ның мобиль ҡушымтаһы менән бергә технологик ҡарарҙар пакетын, технологик түңәрәктәр, онлайн-саралар селтәрен әҙерләнек. Уларҙа ҡатнашыу уҡыусыларға уйындарҙа өҫтәмә мөмкинлектәр алырға, башҡа ихтыяжлы компетенцияларға өйрәнергә ярҙам итәсәк. – Бөгөн балаларыбыҙ һәм үҫмерҙәребеҙ һанлы ҡоролмаларға һәм мобиль ҡушымталарға күп ваҡыт бүлә, – тип билдәләне “Берлога” проектын ойоштороусыларҙың береһе Геннадий Букаев. – Мин уйын аша балаларҙың мәғлүмәт менән эшләргә өйрәнеүен теләнем. Был идея менән Стратегик башланғыстар агентлығына килдем, унда минең идеямды әүҙем хупланылар. Иҫегеҙгә төшөрәбеҙ, 15 июндә Петербург халыҡ-ара иҡтисади форумы сиктәрендә Башҡортостан стендында Милли киберфизика платформаһы һәм “Берлога” проектының презентацияһы үтте. - Проект, ысынлап та, уникаль булып тора. Радий Фәрит улының һәм республиканың бөтә командаһының тырышлығы менән беҙ был тәжрибәне өҫтәмә белем биреү системаһы нигеҙендә тикшерә аласаҡбыҙ, - тине Технологик түңәрәктәрҙә ҡатнашыусылар ассоциацияһы президенты, “Түңәрәктәр хәрәкәте” йүнәлеше буйынса Милли технологик инициатива лидерҙарының береһе Алексей Федосеев. Фото: Башҡортостан Башлығы сайты.