15 июндә Петербург халыҡ-ара иҡтисади форумында Рәсәй Хөкүмәте Премьер-министрының беренсе урынбаҫары Андрей Белоусов Башҡортостандың күргәҙмә стендын ҡараны. Төбәк етәксеһе Радий Хәбиров республика үҫешенең өҫтөнлөклө йүнәлештәре, шулай уҡ төрлө проекттар һәм ҡаҙаныштар хаҡында һөйләне. Стендта инвестицион, туристик, сәнәғәт һәм фәнни-белем биреү мөмкинлектәре күрһәтелде. Айырым экспозиция “Берлога” милли киберфизик платформаһына арналған. – Башҡортостан – йылдам үҫешеүсе төбәк. Республика павильоны – форумда иң яҡшыларҙың береһе һәм һеҙҙең уңыштарығыҙҙы лайыҡлы сағылдыра. Һуңғы йылдарҙа һөҙөмтәле идара итеү командаһы һәм эшһөйәр кешеләр арҡаһында төбәктә күп нәмәгә өлгәшелде, – тип билдәләне Андрей Белоусов. Вице-премьер пилотһыҙ авиация өлкәһендәге ҡаҙаныштар, шул иҫәптән БАС-200 осоу аппараты менән дә танышты. Уны “Ростех” дәүләт корпорацияһының “Рәсәй вертолеттары” холдингы әҙерләне. Был машинаны сериялы етештереүҙе Күмертау авиация производство предприятиеһында ойошторғандар. – Рәсәй Президенты ҡушыуы буйынса 2023 йылдың 1 сентябренә тиклем беҙ пилотһыҙ аппараттар буйынса яңы милли проектты раҫларбыҙ һәм ошо йүнәлеште әүҙем үҫтерә башларбыҙ. Республиканың бында яҡшы компетенциялары булыуын беләм, – тине Андрей Белоусов. Ошо уҡ көндө Башҡортостан стендын Абхазияның вице-премьеры, финанс министры Владимир Делб, вице-премьер, иҡтисад министры Кристина Озган һәм ил парламенты спикеры Лаша Ашуба составындағы делегация ҡараны. Бынан тыш, республиканың экспозиция майҙансығында илдең спорт министры урынбаҫары Одес Байсолтанов, Рәсәй спортсыһы һәм сәйәсмәне, грек-рим көрәше буйынса олимпия чемпионы Александр Карелин, хәрби медик Геннадий Дюмин, шулай уҡ йәмәғәт эшмәкәре, Владимир өлкәһенең элекке губернаторы Светлана Орлова булды. Фото: Башҡортостан Башлығы сайты.