Искиткеч урын коточкыч хәлдә иде...

Уфада яшәүче ханым социаль челтәрләрдә Б. Домашников урамындагы 4нче инфекцион дәваханә янындагы тротуарны тәртипкә китерүне сораган. Бу хәбәрне 16 майда Башкортстанга идарә итү үзәге мәгълүмат системасы терки. Совет районы хакимияте хезмәткәрләре мөрәҗәгатьне контрольгә ала. 2 июньдә коммунальчылар тротуарны ремонтлап, башкарылган эшләре турында отчет биргән.“Дәүләт хезмәтләре. Бергә­ләп хәл итәбез” кире элемтә платформасына Уфаның Лесотехникум урамында полиция бүлеге янында бордюр­ларның биеклеге һәм коляскалар өчен төшү урыны булмауга зарланган мөрәҗәгать килгән. Октябрь районының коммуналь хезмәт­кәр­ләре проблеманы тиз арада хәл иткән. Уфа районының Мөдәрис авылындагы Дубки урамында мәктәп автобусы тукталышын ремонтлау үтенечен урындагы хатын-кыз социаль челтәр­ләрдә мартта ук калдырган. Хатын павильонны ныгытуны, эскәмия һәм чүп савыты урнаштыруны сораган. Район хакимияте бу мәсьәләне хәл итәргә алына. Белгечләр конструкцияне тикшергән һәм, ул куркыныч тудырмый, дигән нәтиҗәгә килгән. Шулай да тукталышны алыштырырга карар иткәннәр. Мартта павильонны сүткәннәр, ә июньдә мәйданчыкны әзерләп, яңасын урнаштырганнар. Нефтекамада яшәүче бер хатын Сәламәтлек сукмагына, атап әйткәндә, этләр йөрү мәйданчыгына яктылык урнаштыруны сораган. Ул социаль челтәрләрдә мөрәҗә­гатен мартта калдырган, проблеманы хәл итүгә Нефтекама шәһәре хакимияте кушылган. Озак та үтмәгән “РЭС” ресурслар белән тәэмин итүче оешма белгеч­ләре Сәламәтлек сукмагында, этләр йөрү мәйданчыгында ике яктырту баганасы урнаштырган. Бикбай урамыннан Российская урамына күтәрелгән юлны ремонтлау үтенече белән Уфа халкы социаль челтәрләрдә күптапкырлар яза. Шәхси сектор аша үткән бу юл автоһәвәс­кәрләр арасында популяр: ул вакытны экономияләргә ярдәм итә. Башкортстанның ЦУР сис­темалары мөрәҗәгатьләрнең берсен теркәгән. Аны Октябрь районы хакимияте эшкә алган. Районның юл хезмәткәрләре бел­дерүенчә, эшләр планлы рә­вештә, зур участокларда алып барыла. Ә Ишембайда яшәүче хатын-кыз үтенече буенча тротуар асфальтланган. Хәбәрне тер­кәгәннән соң, Ишембай хакимияте мәсьәләне хәл итүгә керешә. Берничә көннән тротуар яңара.Уфада яшәүче Анна Петрова Башкортстан Башлыгы Радий Хәбировка Салават Юлаев исемендәге бакчадагы асылмалы күпернең торышына игътибар итүне сорап мөрәҗәгать итә. Аның сүз­ләренчә, башка­ланың төп истәлекле урын­нарының берсе әкренләп җимерелә. “Бәлки, аны эшләргә вакыттыр, – дип яза ханым. – Шундый искиткеч истәлекле урын һәм шундый коточкыч хәлдә. Күпернең ташлары коела, пычрак...” Исемсез чокыр һәм кечкенә инеш аша асылмалы күпер узган гасырның 50нче еллары ахырында төзелгән. Соңгы тапкыр ул 2014 елда ремонтланган, ә 2016 елда анда декоратив “светодиод”лы яктырткыч монтажланган. Әлеге ханымның соравына шәһәр хакимияте вәкилләре тиз арада җавап бирә һәм хәлне ачыкларга вәгъдә итә. 2 июньдә шәһәрнең Ясалма корылмаларны ремонтлау һәм карап-тоту буенча махсуслаштырылган идарәсе хезмәткәр­ләре күперне ремонтлаган. 1 майда Октябрьский шәһәрендә яшәүче берәү социаль челтәрләрдә Ю. Гагарин һәйкәле постаментын ремонтларга кирәк, дигән фикер белдергән. ЦУР аны шәһәр хакимиятенә җибәргән. Торак-коммуналь хуҗалык һәм төзек­ләндерү хезмәткәрләре урынга чыгып, скульптураның торышын караган һәм объектны майда ремонтлауны планлаштырган. Ай ахырында “Төзекләндерү” предприятиесе хезмәткәрләре проблеманы хәл итеп, башкарылган эшләр турында отчет тота. Калтасы районының Куян авылында бер ай инде чүп-чар чыгармыйлар икән. “Коточкыч ис, яныннан үтәрлек түгел. Тирә-якта янгыннар күп, бу хәл янгын белән дә яный”, – дип язган бер ханым. “Дюртюлимелиоводстрой” җәм­гыяте төбәк операторы вәкиле Илдар Вәлиев мәгълүматлары буенча, 10 июньдә Куян авылыннан чүп-чар чыгарыла. График чүп-чарның зур күләме аркасында күчерелгән булган”, – дип язганнар ЦУРдан.