Red Wings авиакомпанияһы осоштар географияһын киңәйтәсәк

Төньяҡ баш ҡалала Петербург халыҡ-ара иҡтисади форумы сиктәрендә Башҡортостан Республикаһы Хөкүмәте Премьер-министры Андрей Назаров Red Wings авиакомпанияһының генераль директоры Евгений Солодилин менән осрашты. Улар "Өфө" халыҡ–ара аэропортынан осош географияһын киңәйтеүҙе тикшерҙе: Өфө–Минск (икенсе йышлыҡ), Өфө–Астана, Өфө–Тегеран, Өфө–Шанхай, Өфө - Владикавказ. Башҡортостан донъяның 112 иле менән әүҙем хеҙмәттәшлек итә, тип билдәләне Министрҙар кабинеты башлығы. 2022 йыл йомғаҡтары буйынса сит илдәр менән тышҡы сауҙа әйләнеше 5,1 миллиард долларҙан ашып китә. Был шарттарҙа дуҫ илдәр менән үҙ-ара эш итеү һәм улар араһында транспорт бәйләнешен үҫтереү айырыуса әһәмиәткә эйә була. - Red Wings авиакомпанияһы менән берлектә, Белоруссияның транспорт министрлығы ярҙамында, быйыл март айында Өфө менән Минск араһында тура бәйләнеш асылды. Бөгөнгө көнгә 15 рейс башҡарылған, 2 меңдән ашыу пассажир ташылған. Осоштар башланғандан алып уртаса йөкләнеш 79% тәшкил итә. Алда беҙҙе бик мөһим һәм яуаплы сара көтә – федераль кимәлдә 26-28 июндә Өфөлә Рәсәй һәм Белоруссия төбәктәренең Х Юбилей форумын үткәреү тураһында ҡарар ҡабул ителде. Һис шикһеҙ, бындай күләмле сара ике илдең төбәктәре, бизнесы һәм ойошмалары араһындағы бәйләнештәрҙе киңәйтәсәк. Ошо шарттарҙа Минск менән Өфө араһында транспорт бәйләнешен үҫтереү, икенсе даими авиарейсты ойоштороу айырыуса әһәмиәткә эйә, – тип аңлатты Андрей Назаров. Уҙған йыл йомғаҡтары буйынса Беларусь Республикаһы республиканың тышҡы сауҙа әйләнешендә 4-се урынды биләй. Был ил менән партнерлыҡ бәйләнештәрен артабан нығытыу маҡсатында Башҡортостандың өлкән быуын граждандары өсөн Белоруссияға сәфәрҙәр ойоштороу буйынса берлектәге проект – “Башҡорт-Белорус оҙон ғүмерлелеге” тормошҡа ашырыла. Сығанаҡ: pravitelstvorb.ru