Эшлекле осрашыу булды

15 июндә XXVI Петербург халыҡ-ара иҡтисади форумында Башҡортостан Башлығы Радий Хәбиров “Росагролизинг” акционерҙар йәмғиәтенең генераль директоры Павел Косов менән осрашты. Көн тәртибендә - компанияның төбәктең агросәнәғәт комплексы менән хеҙмәттәшлеген киңәйтеү мәсьәләләре. Билдәләп үтәйек, 2019 йылдан “Росагролизинг” ауыл хужалығы техникаһы паркын яңыртыуҙың льготалы программаларын тормошҡа ашыра, унда Башҡортостан аграрийҙары әүҙем ҡатнаша. 2023 йылдың биш айында хужалыҡтарҙың техник паркын дөйөм хаҡы 1,4 миллиард һумлыҡ 204 яңы машина тулыландырған. Өҫтәүенә республика ауыл хужалығы етештереүселәренә өҫтәмә ярҙам күрһәтә һәм тәүге иғәнәгә, лизинг буйынса түләүҙәргә сығымдарҙың бер өлөшөн ҡаплай. – “Росагролизинг” – хужалыҡтарҙың техник паркын яңыртыуҙа ышаныслы партнерыбыҙ, – тине Радий Хәбиров. – Ғәмәлдәге программалар арҡаһында беҙ яңы тракторҙар һәм комбайндар, төбәктең агросәнәғәт комплексы өсөн башҡа ҡорамалдар һатып алабыҙ. Был баҫыу эштәрен үткәреү ваҡытын ҡыҫҡартырға, дөйөм алғанда тармаҡтың һөҙөмтәлелеген арттырырға мөмкинлек бирҙе. Осрашыуҙа агротехника менән тәьмин итеүҙең льготалы программалары параметрҙарының көнүҙәклеген тикшерҙеләр. Павел Косов 2023 йылдың апрель башынан “Росагролизинг” яңы “Түләүһеҙ агромиҙгел” акцияһын башлап ебәреүен хәбәр итте. Уның буйынса ауыл хужалығы етештереүселәре сәсеү эштәре башланыр алдынан 2024 йылдың сентябренә тиклем төп бурысты түләүҙе кисектереп лизингыға техника алыу мөмкинлегенә эйә. – Һуңғы дүрт йылда республикаға йәлеп ителгән инвестициялар күләмен ярайһы уҡ арттырҙыҡ. Республиканың аграрийҙарға күрһәткән дәүләт ярҙамы саралары быға булышлыҡ итте. Быйыл Башҡортостанға 4,5 миллиард һумға яңы техника ҡайтарырға планлаштырабыҙ, – тип билдәләне Павел Косов. Ул шулай уҡ “Росагролизинг”тың халыҡ-ара һөйләшеүҙәр йомғаҡтары буйынса льготалы программаларҙа Белоруссияла һәм Ҡытайҙа етештерелгән ауыл хужалығы техникаһын поставкалауҙа ҡатнашыуы тураһында килешеүҙәргә өлгәшеүен хәбәр итте. Фото: Башҡортостан Башлығы сайты.